प्रिमियरमा तारिफ पाएको ‘रियाल रिङ्गेट’लाई देशभर निराशाजनक शो, अग्रिम बुकिङ पनि त्यस्तै
काठमाडौं । शुक्रबारदेखि देशव्यापी रूपमा प्रदर्शनमा आउन लागेको चलचित्र ‘रियाल रिङ्गेट’ ले देशभरका मल्टिप्लेक्सहरूबाट अपेक्षा गरेजस्तो साथ भने पाएको छैन । देशका प्रमुख सिनेमा चेनहरूले यो चलचित्रलाई सीमित मात्रामा शो दिएका छन् ।
नेपालकै सबैभन्दा ठूलो मल्टिप्लेक्स चेन क्युएफएक्स सिनेमाजले उपत्यकाभित्रका आफ्ना हलहरूमा जम्मा ४ शो मात्र उपलब्ध गराएको छ भने उपत्यका बाहिर ७ शो दिएको छ । यस्तै, आईएनआई सिनेमाजले आफ्ना चार शाखामा एक/एक शो छुट्याएको छ । अन्य धेरै मल्टिप्लेक्सहरूले पनि यस्तैगरी प्रतिहल एक/एक शो मात्र दिइरहेका छन् ।
चलचित्रको अग्रिम टिकट बुकिङ पनि बुधबारदेखि खुला भइसकेको छ । यो चलचित्रले हालसम्म पाएको शो संख्या हेर्दा देशभर ७० हाराहारीमा शो प्राप्त गरेको वितरक गाेविन्द शाहीले बताए । तर, निराशाजनक शो संख्याको असर बुकिङमा पनि देखिएको छ, धेरै हलहरूमा दर्शकहरूको प्रतिक्रिया सुस्त छ । अधिकांश शो खाली छन् । धेरै शोमा त एउटा पनि टिकट बिक्री भएको छैन ।
प्रिमियरमा देखियो सकारात्मक माहोल
चलचित्र ‘रियाल रिङ्गेट’ को रिलिजको पूर्वसन्ध्यामा बुधबार काठमाडौंमा आयोजना गरिएको प्रिमियर शो भने निकै प्रभावशाली रह्यो । सो अवसरमा चलचित्र युनिटका सदस्यहरू, राष्ट्रिय कलाकारहरू, सञ्चारकर्मीहरू र विभिन्न क्षेत्रका विशिष्ट व्यक्तिहरू उपस्थित थिए ।
चलचित्रले वैदेशिक रोजगारीको पीडा र नेपाली समाजको गम्भीर यथार्थलाई पर्दामा उजागर गरेको छ । फिल्मको शीर्षकमै कतार र साउदीको मुद्रा ‘रियाल’ र मलेसियाको ‘रिङ्गेट’ समेटिएर यसको विषयवस्तुको गहिरो संकेत गरिएको छ । निर्देशक विभोर पोखरेलको निर्देशन र निर्माता गगनलाल प्रधानको निर्माणमा बनेको यो चलचित्रले प्रवासी नेपालीहरूको संघर्षलाई सजीव रूपमा प्रस्तुत गर्न खोजेको छ ।
प्रिमियरमा उपस्थित अधिकांश दर्शकले चलचित्र हेरेपछि आफू भावुक बनेको प्रतिक्रिया दिए । “यो केवल चलचित्र मात्र होइन, लाखौँ नेपालीहरूको कथा हो,” उनीहरूले भने । चलचित्रले वैदेशिक रोजगारीको पीडा, सामाजिक–आर्थिक बाध्यता र राजनीतिक अवस्थालाई बलियो ढंगले चित्रण गरेको उनीहरूको भनाइ थियो ।
कतिपय दृश्यहरूले इराकमा बन्धक बनाई हत्या गरिएका १२ नेपालीको घटनालाई पनि सम्झाउने गरी भावुक बनाएको यो चलचित्र हेर्नेहरुको प्रतिक्रिया थियो । नेपाली चलचित्रले पनि रुवाउन सक्छ भन्ने महसुस गरायो, मरुभूमिमा सपनाको भारी बोकी हिँडेका नेपाली कसरी जीवन त्याग्न बाध्य हुन्छन् भन्ने चित्रण निकै प्रभावशाली छ।”
वरिष्ठ कलाकार मदनकृष्ण श्रेष्ठ चलचित्र हेरेपछि निकै भावुक बने । उनले भने, “यो चलचित्र हेर्दा देशको पीडा महसुस हुन्छ । इराकमा १२ नेपाली मारिएको दिन सम्झिएँ । राज्यले जाने ढोका मात्र होइन, फर्कने ढोका पनि खोल्नुपर्छ । देशमै रोजगारीको वातावरण बनाउनु आवश्यक छ ।”
वरिष्ठ गायक प्रेमराजा महतले चलचित्रको प्रशंसा गर्दै भने, “धेरैपछि यति सशक्त नेपाली चलचित्र हेर्ने मौका मिल्यो । कथा, अभिनय, संगीत सबै पक्ष उत्कृष्ट छन् । राजनीतिज्ञहरूले पनि यो चलचित्र हेर्नुपर्छ, यसले देशको वास्तविक अवस्था बुझ्न सहयोग पुर्याउँछ ।”
प्रमोद चौलागाईं र निता ढुङ्गाना मुख्य भूमिकामा रहेका यस चलचित्रमा छुल्ठिम डोल्मा गुरुङ, रवीन्द्र खड्का, ध्रुव कोइराला, प्रेम सुब्बा, रामचन्द्र अधिकारी, रियर राई, रोशन श्रेष्ठ, ईश्वरी बराल, विमला गिरी, सीमा केसी, सन्दीप तामाङ, सुवास थापा मगर, विशाल थापा लगायतका कलाकारहरूको सशक्त अभिनय रहेको छ ।
प्रदीप भारद्वाजले लेखन गरेका यस चलचित्रको छायाङ्कन भारतको राजस्थान, नेपालका चितवन, काठमाडौं र लेटाङमा गरिएको हो ।