वसन्त र शान्तिश्रीले रेकर्ड गरे ‘झिँगेदाउ २’ गीत
काठमाडौं । ज्ञानेन्द्र देउजाको निर्माण तथा निर्देशन रहने सिनेमा ‘झिँगेदाउ २’को गीत रेकर्डिङ गरिएको छ । बुधबार पछिल्लो समयकी चर्चित गायिका शान्तिश्री परियार तथा गायक वसन्त थापाको स्वरमा ‘आजलाई नाई नभन’ गीत रेकर्ड गरिएको हो ।
गायक तथा थापाले ‘छ माया छपक्कै’ पछि दोस्रो पटक पाश्र्व गायनको नेपाली सिनेमाको गीतमा स्वर भरेका हुन् । यो गीतमा संगीतकार पोखरेलको नै शब्द, संगीत र एरेञ्ज रहेको छ । गायक थापा र संगीतकार अर्जुन पोखरेलले पहिलो पटक सहकार्य गरेका हुन् ।
गायिका परियार, निर्देशक देउजा र संगीतकार पोखरेलले यसअघि झिँगेदाउको गीत ‘आगो बिना बिँडी जल्दैन’मा सहकार्य गरेका थिए । यो गीत हिट भएकाले निर्देशक देउजाले लक्की चार्मको रुपमा ‘झिँगेदाउ २’मा समेत गायिका परियारसँग सहकार्य गरिएको बताउँछ ।
अबको १० दिनमा गीतलगायत सिनेमाको सम्पूर्ण प्रि–प्रोडक्सको काम सकिने र तिहार लगत्तै छायांकमा निस्कने तयारी निर्माण टिमको छ ।
यो सिनेमाको कथा पहिलो भाग जहाँ सकिएको थियो । त्यँहीबाट सुरुहुने भएकाले ‘झिँगेदाउ २’ पूर्ण रुपमा सिक्वेल रहेको निर्देशक देउजाले जानकारी दिए ।
सिनेमाको मुख्य भूमिकामा केकी अधिकारी, आँचल शर्मा, मुकुन भुषाल, कुशल बिष्टसहित पहिलो भागका अधिकाँश कलाकार दोहोरिने छन् । यो बाहेक एक अभिनेता र एक अभिनेत्री नयाँ कलाकारको प्रवेश हुनेछ ।