‘माइतीघर’को पहिलो झलकमा मुख्य पाँच पात्र
काठमाडौं । मिलन तामाङको निर्देशनमा तयार भएको चलचित्र ‘माइतीघर’को पहिलो झलक सार्वजनिक भएको छ ।
आउँदो दशैंको फूलपातीका दिन अर्थात असोज १३ गतेदेखि देशभरका हलमा प्रदर्शनमा आउने तयारीमा रहेको सिनेमाको निर्माणपक्षले शुक्रबार चलचित्रका मुख्य पात्रहरु चरित्र चित्रण खुलाउने पहिलो झलक सार्वजनिक गरेको हो ।
विजय बस्यालले डिजाइन गरेको पोस्टरमा मुख्य पाँच पात्रलाई देखाइएको छ । जसमा मुख्य पात्रहरु आफ्नै परिस्थित अनुकूल भावमा देखिएका छन् ।
चलचित्र ‘माइतीघर’ ले तामाङ समुदायको संस्कृति र जीवनशैलीलाई कथाको मूल धार बनाएको छ ।
रोहित अधिकारी फिल्मस्को ब्यानरमा निर्माण भएको चलचित्रमा केदार घिमिरे, धिरज मगर, प्रकाश सपुत, उपासना सिंह ठकुरी, श्यामाश्री शेर्पा, बुद्धि तामाङ र शिशिर वाङ्देललगायत कलाकारहरुको प्रमुख भूमिका रहेको छ ।
सुसन प्रजापतिको छायांकन रहने चलचित्रका रविन शेरचन र धीरज तामाङ सह-निर्माता हुन् भने कार्यकारी निर्मातामा इश्वर श्रेष्ठ र नीरज कटुवाल रहेका छन् ।
चलचित्रमा चन्द्रकुमार दोङको कथा, रामशरण पाठकको पटकथा तथा संवाद, सुरेन्द्र पौडेलको सम्पादन, किरण खरेल, कुमार स्याङ्बा र राम अविरलको गीत, चन्द्रकुमार दोङ, एलिस कार्की, एस.डी योगी र स्वर्गिय जयदेवको संगीत, अष्ट महर्जनको एक्सन, साहिल खानको टिजर र ट्रेलर छ ।
निर्माणपक्षले चलचित्रको नाम ‘माइतीघर’ राखे पनि यो पुरानो चलचित्र माइतीघरको सिक्वेल नरहेको बताएको छ । शीर्ष गीत भने पुरानो ‘माइतीघर’को हुनेछ ।
निर्माता अधिकारीले यसअघि निर्माण गरेका गाजलु, छ माया छपक्कै र फर्की फर्की जस्ता चलचित्रले दर्शकमाझ राम्रो सफलता पाएका थिए ।