मध्य रातमा ल्याए प्रकाश सपुतले ‘नाइँ भनेसी नाइँ’

काठमाडौं । गायक तथा अभिनेता प्रकाश सपुतले नयाँ गीत ‘नाइँ भनेसी नाइँ’ सार्वजनिक गरेका छन् । शुक्रबार ल्याउने चर्चामा रहेको गीत उनले मध्यराती ११ बजेपछि मात्रै युट्युबमा रिलिज गरेका हुन् ।
यो गीतको भिडियोमा अभिनेत्री रेखा थापा, प्रकाश सपुत, सिम्रन खड्का र संजोग रसाईलीले अभिनय गरेका छन् । प्रकाशले यो गीत ‘बदला बरिलै २’ का रूपमा सार्वजनिक गरेका हुन् ।
गीतमा पछिल्लो पुस्ताका दुई चर्चित गायिकाहरू समीक्षा अधिकारी र एलिना चौहानको स्वर छ । उनले तीज कोसेलीका रूपमा ल्याएको यो गीतमा शब्द तथा संगीत प्रकाशको छ । संगीत संयोजनको काम श्यामश्वेत रसाईलीले गरेका हुन् ।
यो गीतमा प्रकाशले बलात्कारका घटना विरूद्धको विषय उठाउन गरेका छन् । उनले भनेका छन्– ‘यो तीज गीत नाइँ भनेसी नाइँ (बदला बरिलै २) जबरजस्ती करणी विरूद्दको एउटा आवाज हो । हामीलाई विश्वास छ तपाईले पनि आवाजमा आवाज मिसाउनु हुनेछ ।’
भिडियोको परिकल्पना तथा निर्देशन प्रकाश सपुतको हो । यसमा छायांकन बुद्ध थापा र सम्पादन प्रविन भट्टको छ ।