२१ वर्षपछि फेरि ‘सुख दुःख’मा देखिँदै मदनकृष्ण श्रेष्ठ
काठमाडौं । पारिवारिक कथामा आधारित रहेर निर्माण हुने चलचित्र ‘सुख दुःख’ मा वरिष्ठ कलाकार मदनकृष्ण श्रेष्ठ अनुबन्ध भएका छन् ।
अभिनेत्री नीता ढुंगानाले डेब्यू निर्देशनमा निर्माण हुने चलचित्रको निर्माण टिमले शुक्रबार कलाकार श्रेष्ठलाई एक महत्वपूर्ण भूमिकाका लागि अनुबन्ध गरेको हो ।
कलाकार श्रेष्ठले चलचित्रमा अनुबन्ध भएपछि प्रतिक्रिया दिँदै कथा आफूलाई निकै मन परेकोले अभिनयमा सहर्ष तयार भएको जनाए । ‘सुख दुःख’को कथा सुनिसकेपछि भावुक बनेको भन्दै उनले पटकथाले आफूलाई छोएको उल्लेख गरे ।
कलाकार श्रेष्ठलाई आफ्नो चलचित्रमा सहभागीता गराउन पाउँदा नीता ढुंगाना उत्साहित देखिएकी छन् । उनले भनिन्, “स्क्रिप्ट सुनाउँदा उहाँ भावुक हुनुभयो । उहाँले कथा मन पराएपछि अभिनय गर्न अझै उत्साहित देखिनुभयो ।”
यसअघि यही चलचित्रका लागि आइतबार अभिनेत्री मिथिला शर्मालाई पनि अनुबन्ध गरिएको थियो । २०६१ सालमा प्रदर्शन भएको स्वर्गीय निर्देशक शिव रेग्मीको कालजयी सिनेमामध्ये एक मानिन्छ, ‘सुख दुःख’ । जसमा मदनकृष्णसँगै मिथिला, स्व. श्रीकृष्ण श्रेष्ठ, स्व. केशव भट्टराई र झरना थापाको मुख्य भूमिका थियो ।
उक्त नाममा २१ वर्षपछि फेरि बन्न लागेको यो चलचित्रमा पनि मदनकृष्ण र मिथिलालाई जोडीको रुपमा देख्न पाइने भएको छ । यद्यपि अन्य प्रमुख कलाकारहरूको टुंगो लगाइएकाे छैन ।
यो चलचित्रमा छायांकनका लागि भारतका चर्चित छायाँकार कवीरलाल र शाहिदलाललाई पहिल्यै अनुबन्ध गरिएको छ ।
‘नीता फिल्म्स’को ब्यानरमा बन्न लागेको चलचित्र ‘सुख दुःख’लाई २०८३ सालको दशैंको फूलपातिमा रिलिज गरिने निर्माणपक्षले बताएको छ ।
चलचित्रको वितरण अधिकार उपत्यकाभित्र रिच इन्टरटेन्मेन्टले लिएको छ भने उपत्यकाबाहिरको वितरण अधिकार एफडी कम्पनीले लिएको छ ।