‘आइडिया फर वर्ल्ड नेपाल’को ब्रान्ड एम्बेसडरमा अभिनेत्री बेनिशा
काठमाडौं । ‘आइडिया फर वर्ल्ड नेपाल’ को ब्रान्ड एम्बेसडरमा अभिनेत्री बेनिशा हमाल नियुक्त भएकी छन् ।
आधुनिक आवास निर्माण प्रविधिमा नयाँ सोच र सम्भावना ल्याउने उद्देश्यसहित सुरुवात भएको आइडिया फर वर्ल्ड ट्रेडिङ प्रालिले अभिनेत्री हमाललाई ब्रान्ड एम्बेसडर घोषणा गरेको हो ।
आइडिया फर वर्ल्ड नेपाल एक नवप्रवर्तनशील होम हाउस प्रविधिमा आधारित कम्पनी हो, जुन बेलायतबाट प्रवर्तन भएको हो ।
संस्कृति, पर्यटन तथा नागरिक उड्डयनमन्त्री बद्रि प्रसाद पाण्डेको प्रमुख आतिथ्यमा बुधबार काठमाडौंको कमलादीस्थित स्काई टावरमा आयोजित एक भव्य समारोहमा डोम हाउससहित २४ ओटा अन्तर्राष्ट्रिय स्तरका उत्पादनहरू सार्वजनिक गरिएको थियो ।
संयुक्त अधिराज्य (यूके) मा विकसित डोम हाउसलाई आधुनिक निर्माण प्रविधिको उदाहरणका रूपमा प्रस्तुत गरिएको छ। कम्पनीका अनुसार यो परियोजना नवप्रवर्तन, पहुँचयोग्यता र वातावरणीय उत्तरदायित्वको संयोजनमा आधारित छ । नेपालमा यस्तो संरचना प्रवर्द्धनले दिगो र सुलभ आवास निर्माणमा उल्लेखनीय योगदान पुर्याउने विश्वास आइडिया फर वर्ल्ड ट्रेडिङको छ ।
कार्यक्रममा बोल्दै निर्देशक सन्तोष सुवेदीले ‘प्रभावका लागि नवप्रवर्तन, प्रगतिका लागि साझेदारी’ भन्ने नाराका साथ कम्पनी अघि बढिरहेको बताए ।
ब्रान्ड एम्बेसडर बेनिशा हमालले यस्ता प्रबिधिमूलक प्रयासले नेपालको अन्तर्राष्ट्रिय पहिचान निर्माण र दिगो विकासमा महत्वपूर्ण भूमिका खेल्ने धारणा व्यक्त गरिन् ।
कम्पनीकी प्रमुख कार्यकारी अधिकृत उषा खतिवडाले यो शुभारम्भ केवल व्यावसायिक उपलब्धि नभई नेपालले नवप्रवर्तन र दिगोपनामा नेतृत्व गर्न चाहने स्पष्ट संकेत भएको बताइन् ।
समारोहमा डोम हाउसको डिजाइन, निर्माण गुणस्तर, र दीर्घकालीन उपयोगिताबारे प्रत्यक्ष जानकारी प्रदान गरियो । यस अवसरमा कम्पनीले आगामी साउन २२ गते (अगस्ट ७) भित्र प्रि-बुक गर्ने ग्राहकलाई १५ प्रतिशतसम्मको विशेष छुट उपलब्ध गराउने घोषणा पनि गरेको छ ।
कार्यक्रममा प्रतिनिधिसभा सांसद, उद्यमी, होटल व्यवसायी, कूटनीतिक प्रतिनिधि र विज्ञहरूको समेत उपस्थिति थियो ।