हलसँग असन्तुष्टि जनाउँदै निर्माताले रोके चलचित्र ‘रियाल रिङ्गेट’को प्रदर्शन
काठमाडौं । यसै साता प्रदर्शनमा आएको नेपाली चलचित्र ‘रियाल रिङ्गेट’को प्रदर्शन स्थगित गर्ने निर्णय गरेको निर्माताले बताएका छन् । भोलि सोमबारदेखि नेपालभरका सबै हलहरुमा प्रदर्शन स्थगन गरिएको निर्माता गगनलाल प्रधानले विज्ञप्ति जारी गर्दै जनाएका छन् ।
विज्ञप्तिमा चलचित्रलाई उचित समयको नदिएको कारण फिल्मलाई दर्शकसामु प्रभावकारी ढंगले प्रस्तुत गर्न नसकिने अवस्था आएको जनाइएको छ ।
“दर्शकको सकारात्मक प्रतिक्रिया प्राप्त हुँदाहुँदै र हललाई बारम्बार अनुरोध गर्दा पनि उपयुक्त शोको बारेमा बेवास्ता गरिएको कारणले हामीले प्रदर्शन स्थगित गर्ने जस्तो कठोर निर्णय लिन बाध्य भयौँ,” निर्माता प्रधानले बताए ।
चलचित्र निर्माणमा गरिएको परिश्रम, मेहनत र लगानी अनुरूप प्रदर्शन समय नपाएकाले बाध्य भएर चलचित्र हलबाट निकाल्नु परेको विज्ञप्तिमा जनाइएको छ ।
विभोर पोखरेलले निर्देशन गरेको चलचित्र ‘रियाल रिङ्गेट’ले खाडी मुलुकहरूमा रोजगारीको सिलसिलामा गएका नेपालीहरूको जीवन भोगाइलाई पर्दामा उतारेको छ ।
प्रमोद चौलागाईं र निता ढुङ्गाना मुख्य भूमिकामा रहेको चलचित्रमा छुल्ठिम डोल्मा गुरुङ, रवीन्द्र खड्का, ध्रुव कोइराला, प्रेम सुब्बा, रामचन्द्र अधिकारी, रियर राई, रोशन श्रेष्ठ, ईश्वरी बराल, विमला गिरी, सीमा केसी, सन्दीप तामाङ, सुवास थापा मगर, विशाल थापालगायत अभिनय छ ।