स्वास्थ्य समस्याका कारण ‘जहाजैमा’बाट बाहिरिए सौगात
काठमाडाैं । चलचित्र ‘जहाजैमा’ बाट अभिनेता सौगात मल्लले अलगिने निर्णय गरेका छन् । करिब एक महिनाअघि यस चलचित्रमा अनुबन्धित भएका उनले स्वास्थ्य समस्याका कारण हात झिकेका हुन् ।
आगामी भदौदेखि जापान, फिलिपिन्स र नेपालका विभिन्न स्थानमा छायांकन गर्न लागिएको चलचित्रका लागि मल्ल मुख्य कलाकारको रूपमा चयन भइसकेका थिए । कृषा चौलागाइको निर्देशनमा बन्ने ‘जहाजैमा’मा यसअघि कलाकार केदार घिमिरे फाइनल भइसकेका छन् । चलचित्रमा जापानीज अभिनेत्री रुजेल इचिमियाले पनि काम गर्ने पक्का भइसकेको छ ।
अभिनेता मल्लले हालै खुट्टाको शल्यक्रिया (सर्जरी) गराएको र स्वास्थ्य अवस्था अझै पूर्ण रूपमा सुधार नभएकाले यस चलचित्रबाट बाहिरिनुपरेको जानकारी दिएका छन् ।
संक्षिप्त कुराकानीमा अभिनेता मल्लले भने, “हालै मैले खुट्टाको सर्जरी गराएको थिएँ । चिकित्सकको सल्लाहअनुसार कम्तीमा एक महिना आराम गर्नुपर्ने भएकोले ‘जहाजैमा’ नगर्ने निर्णय गरेको हुँ ।”
चलचित्र ‘जहाजैमा’मा केही एक्सन दृश्यसमेत रहेका कारण त्यसका लागि आवश्यक शारीरिक तयारी गर्न नसकिने देखिएपछि निर्माण टिमसँग सहमतिमा छाडेको उनले बताए ।
उनले भने, “पात्रका लागि तयारी गर्न समय नपुग्ने भयो । अहिलेको अवस्थामा त्यो सम्भव छैन, त्यसैले हामीबीच सकारात्मक समझदारीमै छुट्टिएको हुँ ।”
हाल सौगात मल्ल आफू अभिनीत अर्को चलचित्र ‘सिटामोल’ को प्रचारप्रसारमा व्यस्त छन् । सो प्रचारपछि उनले करिब एक महिनाको विश्राम लिएर अर्को चलचित्र ‘परालको आगो’ को छायांकन सुरु गर्ने तयारीमा रहेको बताए ।
‘जहाजैमा’ जस्तो एक्सन प्रधान चलचित्रबाट बाहिरिए पनि ‘परालको आगो’ मा भने उनको एक्सन दृश्य नरहेको मल्लको भनाइ छ । उनले स्पष्ट पारे, “परालको आगो’ मा एक्सन छैन, त्यसैले खुट्टालाई अप्ठ्यारो नपर्ने भएकाले त्यो फिल्म गर्न सक्छु ।”