‘जनै हराएको मान्छे’ र ‘माग्ने राजा’मा कसले मार्ला बाजी, कसका के विशेषता ?
काठमाडौं । चलचित्र ‘जनै हराएको मान्छे : सम्बन्धका धागाहरू’ र ‘माग्ने राजा’ दुवै अपेक्षा गरिएका चलचित्र हुन् । ‘ऊनको स्वीटर’ पछि हलमा दर्शक फर्काउने चलचित्र यिनै हुन् भन्ने धेरैको विश्वास छ ।
केदार घिमिरेको लोकप्रियताका कारण ‘माग्ने राजा’ र विजय बरालका अभिनयका कारण ‘जनै हराएको मान्छे : सम्बन्धका धागाहरू’ चल्छ भन्ने विश्वास छ ।
संयोग के भने यी दुवै चलचित्र एकै दिन भदौ ६ गते प्रदर्शनमा आउँदैछन् । हलमा दर्शक फर्काउँदै सिनेमा हेर्ने माहोल खडा गर्लान् भनेर आशा गरिएका चलचित्र एकै दिन आउँदा दुवैलाई केही न केही असर गर्नसक्छ । तर दुईवटा चलचित्र एकै दिन रिलिज भए पनि हलको संख्या बढेकाले खासै धेरै भने ब्यापारिक रूपमा असर नगर्ने वितरकहरूले बताउने गरेका छन् ।
राम्रो भएको खण्डमा दुईवटा चलचित्रलाई शो संख्या कम नहुने वितरकहरू बताउँछन् । जे होस् एकै दिन दुईवटा सिनेमा रिलिज हुँदा सोलो रिलिज जस्तो भने पक्कै हुने छैन ।
सुरुमा हल र सामाजिक सञ्जालमा आएको इन्क्वाइरी र लोकप्रियता अथवा हाइपका आधारमा यी दुई चलचित्रलाई शोज उपलब्ध हुनेछ । रिलिजपछि भने जुन चलचित्रले पिकअप लिन्छ त्यसैले विस्तारै शो बढाउँदै जानेछ । जसको वर्ड अफ माउथ बलियो हुनेछ, त्यसैले बाजी मार्नेछ ।
चलचित्र ‘जनै हराएको मान्छे : सम्बन्धका धागाहरू’लाई हिमाल न्यौपानेले निर्देशन गरेका हुन् । यो उनको डेब्यू निर्देशन हो ।
पारिवारिक कथा भन्ने चलचित्रको सवलपक्ष यसले पाएको सकारात्मक प्रतिक्रिया हो । अनाउन्समेन्ट टिजरदेखि नै सकारात्मक पाउँदै आएको छ ।
टिजर रिलिजपछि दर्शकले थप सकारात्मक प्रतिक्रिया दिइरहेका छन् । विशेषगरी चलचित्रले उठान गरेको बाबुआमासँगको छोराछोरीको सम्बन्ध, मुख्य पात्र विजय बरालको अभिनय र कोरिया जाने युवाको कथालाई राम्रो भन्दै प्रतिक्रिया दिइरहेका छन् ।
प्राप्त प्रतिक्रिया हालसम्मको यो चलचित्रको सकारात्मक पक्ष हो । यो चलचित्रमा अनुभवी र अभिनयबाट दर्शकको मन जितिसकेका अभिनेता विजय बराल छन्, यो अर्को साकारात्मक पक्ष हो ।
‘पूर्ण बहादुरको सारङ्गी’पछि विजयले लिड गरेको यो पहिलो चलचित्र हो, त्यसैले यो सिनेमा कस्तो हुनेछ भन्ने दर्शकमा कौतुहलता छ । ‘पूर्ण बहादुरको सारङ्गी’मा विजयको प्रभावको रापताप यो चलचित्रले पाउनेमा निर्माण टिम पूरै ढुक्क छ ।
बाबुआमालाई सुख दिने भन्दै घर छोड्ने छोरो, सहरमा पुगेपछि आफैँ ठगिएपछि उसले पाउने दुःख र वैदेशिक रोजगारका लागि आकर्षक गन्तब्य बनेको कोरिया जाने प्रयास अहिले धेरै नेपालीको कथा हो । त्यसैले विषयवस्तु पनि यसको सबल पक्ष हो ।
चलचित्रमा विजय बराल, केकी अधिकारी र मिरुना मगरसँगै गौरव पहाडी, सुशांक मैनाली, भोलाराज सापकोटा, रियर राई, भावना खपांगी मगर लगायतका कलाकारहरूको पनि अभिनय रहेको छ ।
भानुभक्त ढकालको कथा, पटकथा र संवादमा तयार भएको यो चलचित्रलाई पेपरक्लिपको ब्यानरमा कमल न्यौपाने र विमल न्यौपानेले निर्माण गरेका हुन् । चलचित्रको कार्यकारी निर्मातामा नारायण तिमिसिना, चुडामणि सिवाकोटी, आरके मानन्धर, सिआर बस्नेत, फिलिप डिसी र जेम्स महाराजन रहेका छन् ।
चलचित्रमा शाहिल खानको टिजर–ट्रेलर, सुप्रिम पराजुलीको कलर, सुनील क्षेत्रीको कोरियोग्राफी, चुल्ठे काजीको एक्सन निर्देशन, निर्माण नियन्त्रक लक्ष्मणराज पौडेल रहेका छन् । चलचित्रको एसोसिएट निर्देशमा मनिष राउत छन् ।
‘जनै हराएको मान्छे : सम्बन्धका धागाहरू’को वितरणको जिम्मा गोविन्द शाहीको काफिया फिल्मसले लिएको छ ।
चलचित्र ‘माग्ने राजा’मा केदार घिमिरे (माग्ने बुढा) मुख्य भूमिकामा छन् । निर्माण घोषणा हुँदैदेखि यो चलचित्र चर्चामा छ । विशेषगरी केदार घिमिरेको पहिलो सोलो लिड भएकाले पनि यो सिनेमा कस्तो होला भन्नेमा धेरैको चासो छ ।
यसैगरी उनको यो सिनेमामा लिएको पारिश्रमिकलाई लिएर पनि ‘माग्ने राजा’ चर्चामा छ । ६१ लाख पारिश्रमिक दिएको हो भन्ने निर्माता र होइन भन्ने केदारका कारण पनि यो चलचित्रको हाइप छ ।
दीपकराज गिरीको टिमबाट पहिलोपटक बाहिरको ब्यानरको चलचित्र र त्यसमा पनि लिड रोलमा रहेका कारण पनि यो चलचित्र चर्चामा छ । संयोग के परेको छ भने ‘छक्का पञ्जा ५’मा दीपकको अपोजिटमा वर्षा शिवाकोटी थिइन् । ‘माग्ने राजा’मा केदारको अपोजिटमा पनि वर्षा नै छिन् ।
‘माग्ने राजा’ मार्फत यसका निर्देशक ऋषि लामिछाने ८ वर्ष पछि निर्देशनमा फर्किंदैछन् । त्यसैले उनको कमब्याक पनि कस्तो रहनेछ भन्ने धेरैको चासो छ । यो स्वभाविक पनि हो ।
सामिप्यराज तिमलसेनाले स्क्रिप्ट लेखेका छन् । फुल कमर्सियल सिनेमा भएकाले राम्रो व्यापार गर्नेमा निर्माणपक्ष विश्वस्थ छ ।
‘माग्ने राजा’को निर्माता मुनाल घिमिरे हुन् । उनी चलचित्र ‘इच्छा’ पछि चलचित्र निर्माणमा फर्केका छन् । उनी हाल दाङको घोराही उपमहानगरपालिका वडा नम्बर ४ का वडा अध्यक्ष समेत हुन् ।
‘माग्ने राजा’मा केदारसहित वर्षा सिवाकोटी, विल्सन विक्रम राई, पुष्कर गुरुङ, शिशिर वाङ्देल, शारदा गिरी र टिकटकर मोडल पवित्रा साकी उर्फ मिस पबीको अभिनय छ ।
या चलचित्रमा आर्यन सिग्देलको पनि विशेष भूमिका रहेको छ । आरआर फिल्मस्ले वितरण गर्ने सिनेमामा नरेन्द्र मैनालीको छायांकन, सामिप्यराज तिमल्सेनाको कथा, पटकथा तथा संवाद छ । दीपक शर्मा बाबुल गिरीको संगीत रहेको छ ।