क्यानडा जान लागेका खेम सेन्चुरी अस्वस्थ भएपछि अस्पताल भर्ना
काठमाडौं । चर्चित लोकदोहोरी गायक खेम सेन्चुरीको स्वास्थ्यमा अचानक समस्या देखिएपछि उनलाई अस्पताल भर्ना गरिएको छ ।
एक महिनाको अन्तर्राष्ट्रिय सांगीतिक यात्रामा क्यानडा, इजरायल र अष्ट्रेलिया जान तयारी गर्दै गरेका सेन्चुरीको स्वास्थ्यमा समस्या देखिएपछि उनलाई सिनामंगलस्थित काठमाडौं मेडिकल कलेज (केएमसी) मा भर्ना गरिएको हो ।
विमानस्थलमा प्रारम्भिक स्वास्थ्य जाँच गर्दा अस्पताल लैजान सिफारिस गरिएपछि एम्बुलेन्समा हालेर उनलाई तुरुन्तै विमानस्थलको प्रतीक्षालयबाट फर्काएर अस्पताल लगिएको थियो ।
गायक सेन्चुरीको स्वास्थ्य स्थितिमा क्रमिक सुधार भइरहेको गायक मोहन खड्काले जानकारी दिए ।
“विमानस्थलमै प्रारम्भिक स्वास्थ्य परीक्षण गर्दा चिकित्सकहरूले तुरुन्त अस्पताल जान सुझाव दिएपछि एम्बुलेन्समार्फत उनलाई केएमसी पुर्याइएको हो । हाल उहाँको अवस्था स्थिर छ र स्वास्थ्यमा क्रमिक सुधार हुँदैछ,” गायक खड्काले भने ।
यो स्वास्थ्य समस्याका कारण आगामी अगस्ट ९ मा क्यानडामा हुने हिमालयन मेला कार्यक्रममा उनको सहभागिता असम्भव भएको छ ।
अस्पतालमा गरिएको परीक्षणबाट गायक सेन्चुरीको मिर्गौलामा पत्थरी देखिएको पुष्टि भएको छ । चिकित्सकहरूले औषधिबाट उपचार गर्ने वा शल्यक्रिया आवश्यक पर्ने निर्णय केही दिनमा लिने जनाएका छन् ।
गायक सेन्चुरी क्यानडाको सबैभन्दा ठूलो हिमालयन मेलामा सहभागी हुन लागेका थिए । अस्वस्थताका कारण पहिलो कार्यक्रम नै स्थगित गर्नुपरेकोमा आयोजकहरूले दुःख व्यक्त गरेका छन् । इजरायल र अष्ट्रेलियाका कार्यक्रमहरूमा उनको सहभागिता चिकित्सकको सल्लाहअनुसार निर्धारण हुने बताइएको छ ।
गायक सेन्चुरीको अस्वस्थताको खबर फैलिएसँगै सामाजिक सञ्जालमा शुभचिन्तक तथा समर्थकहरूले उनको शीघ्र स्वास्थ्यलाभको कामना गरिरहेका छन् ।