‘पार्वती’का दुई पोस्टर सार्वजनिक गर्दै निर्माणको घोषणा

काठमाडौं । चलचित्र ‘पार्वती’को घोषणा गरिएको छ ।
नायिका निता ढुंगाना अधिकारीको निर्देशनमा बन्न लागेको सिनेमाको शनिबार रक्षा बन्धनको अवसर पारेर दुई फरक मूडका पोस्टर सार्वजनिक गर्दै निर्माणको घोषणा गरिएको हो ।
सार्वजनिक पहिलो पोस्टरमा ‘पार्वती’ पहेँलो छातामुनि, सिठी र पानीको बोतल बोकेर गम्भीर मुद्रामा देखिन्छिन् । यसले उनको जीवनमा हुने चुनौती, सोचमग्न स्वभाव र भित्रै लुकेको संवेदनशीलता झल्काउँछ ।
दोस्रो पोस्टरमा भने उनी गाउँले पोशाकमै हल्का मुस्कान र लजालु अदा सहित प्रस्तुत भएकी छन्, जसले उनको निराशता, बालपनको रमाइलो र जीवनप्रतिको सहज दृष्टिकोणको संकेत गर्छ ।
निता फिल्म्सको प्रस्तुति रहने यो चलचिको रिलिज मिति समेत घोषणा गरेको छ । निर्माणपक्षले सिनेमाको प्रदर्शन मिति आगामी माघ १ गतेलाई तोकेको छ ।
चलचित्रको कथा निता ढुंगानाले नै लेखेकी हुन् भने पटकथा तथा संवाद शिवम् अधिकारीको हो ।
निर्माण टिममा सानिजा अधिकारी, नरसरी अधिकारी र पवन ढुंगाना छन् । निर्माण पक्षका अनुसार,‘पार्वती’ हास्य, भावना र सामाजिक सन्देश मिसिएको कथा हो, जसमा एक साधारण पात्रको नजरबाट जीवनका रंग, सम्बन्धका मिठास र संघर्षका भाव दर्शाइने बताएको छ ।
असोजबाट छायांकनमा निस्किने चलचित्रको छायांकन कविर लाल र शाहिद लालले गर्नेछन् ।
यो फिल्मको कथाकार तथा प्राविधिक को–को रहने छन् भन्ने बारेमा निर्माण पक्षले खुलाएका छैनन् ।
निर्देशक अधिकारीका अनुसार केहि दिनमा कलाकार तथा थप प्राविधिकहरुको जानकारी दिइने छ । उपत्यकामा रिच इन्टरटेनमेन्ट र एप्पल इन्टरटेनमेन्टले वितरणको जिम्मा लिएको छ भने उपत्यका बाहिर एफडी कम्पनी रहेको छ ।