‘मोहर’लाई दर्शकको बलियो साथ, पहिलो दिनदेखि नै उत्कृष्ट प्रतिक्रिया
काठमाडौं । शुक्रबारदेखि प्रदर्शनमा आएको नेपाली चलचित्र ‘मोहर’ले दर्शकबाट निकै सकारात्मक प्रतिक्रिया पाइरहेको छ । प्रदर्शनको पहिलो दिनदेखि नै बलियो ‘वर्ड अफ माउथ’ पाएको चलचित्रले दोस्रो दिन शनिबार रक्षाबन्धनको अवसरमा पनि उत्कृष्ट प्रदर्शनलाई निरन्तरता दिएको निर्माण पक्षले जनाएको छ ।
चलचित्र हेर्ने अधिकांश दर्शकहरूले सामाजिक सञ्जालमा सकारात्मक प्रतिक्रिया दिँदै फिल्मको कथा, अभिनय र प्रस्तुति प्रशंसा गरेका छन् । यस्ता प्रत्यक्ष सिफारिस र अनुभव–सेयरले अन्य दर्शकलाई पनि हलसम्म तान्ने काम गरेको छ ।
ओम प्रतिकको लेखन तथा निर्देशनमा बनेको यो चलचित्रले देउकी प्रथा जस्तो संवेदनशील सामाजिक विषयलाई मुख्य कथावस्तु बनाएको छ । यसका साथै, चलचित्रमा पल शाह, बेनिशा हमाल र नीति शाह बीचको त्रिपक्षीय प्रेमकथालाई पनि कलात्मक ढंगले प्रस्तुत गरिएको छ ।
शुक्रबार र शनिबार दर्शकबाट मिलेको सकारात्मक प्रतिक्रियाले आगामी दिनमा चलचित्रको व्यापार अझै बढ्ने विश्वास वितरक करण श्रेष्ठले व्यक्त गरेका छन् ।
“फिल्मले अपेक्षा भन्दा राम्रो सुरुवात पाएको छ । दर्शक आफैंले प्रचार गर्ने वातावरण बनेको छ, जसलाई हामी ठूलो सफलता मान्छौं,” वितरक श्रेष्ठले भने।
प्रदर्शनको पहिलो दिन बिहान औसत उपस्थितिमा सुरु भएपनि दिउँसोका केही शोहरूमा उच्च अकुपेन्सीमा प्रदर्शन भएको थियो । चलचित्र हेरेका दर्शकहरूले ‘मोहर’ अपेक्षाभन्दा उत्कृष्ट बनेको प्रतिक्रिया दिएका छन् ।
काठमाडौंका विभिन्न हलमा दर्शकको प्रतिक्रिया लिन पुगेका ‘मोहर’का मुख्य कलाकारहरू दर्शकबाट पाएको माया र प्रशंसाले उत्साहित बनेका छन् । नायक पल शाहले भने, ‘म अहिले बोल्न सकिरहेको छैन । एउटा बलियो निर्देशक र टिमले कलाकारको कामलाई निखार्न सक्छ । हामीले निकै मिहिनेत गरेका थियौं र दर्शकको प्रतिक्रियाले त्यो सफल भएको अनुभव भएको छ ।’
त्यस्तै, चलचित्रमा अभिनयको प्रशंसा बटुलिरहेकी बेनिशा हमालले दर्शकको सकारात्मक प्रतिक्रियाले आफूलाई भावुक बनाएको बताइन् । अर्की नायिका नीति शाहले यस क्षेत्रमा केही गर्नका लागि गरेको मिहिनेत दर्शकको मायाले सफल भएकोमा खुसी व्यक्त गरिन्।
चुम्बनजंग शाही निर्माता रहेको ‘मोहर’मा पल, बेनिशा र नीतिसँगै अर्जुन जंग शाही, लक्ष्मी गिरी, मिथिला शर्मा, रवीन्द्र झा, सारा शर्मा लगायतका कलाकारको अभिनय रहेको छ ।
फिल्म मेकर्स प्रा.लि.को ब्यानरमा निर्माण भएको यो चलचित्रले सुदूरपश्चिममा प्रचलित देउकी प्रथालाई मुख्य विषय बनाएर त्यसले समाजमा पारेको असर र मानवीय संवेदनालाई देखाउन खोजेको छ ।