‘सिटामोल’लाई उत्साहजनक प्रतिक्रिया, दर्शक भन्छन्- कथावस्तुले रुवायो
काठमाडौं । राज बहादुर सानेको निर्देशनमा बनेको चलचित्र ‘सिटामोल’लाई उत्साहजनक प्रतिक्रिया मिलेको छ ।
साउन २३ गते अर्थात् हिजो शुक्रबारदेखि प्रदर्शनमा आएको यो चलचित्रले दर्शकबाट उत्साहजनक प्रतिक्रिया पाइरहेको निर्माण पक्षको भनाइ छ ।
प्रदर्शनको पहिलो दिनदेखि नै सकारात्मक चर्चा बटुलेको चलचित्रले शनिबार जनैपूर्णिमाको सार्वजनिक बिदामा पनि दर्शकको उल्लेख्य साथ पाएको छ । चलचित्र हेरेर हलबाट बाहिरिएका अधिकांश दर्शकले यसको कथावस्तुले मन छोएको र अन्त्यमा भावुक बनाएर रुवाएको प्रतिक्रिया दिएका छन् ।
दर्शकको मायाले उत्साहित हुँदै अभिनेता सौगात मल्ल र अभिनेत्री बेनिशा हमालसहितको निर्माण टोलीले काठमाडौंका विभिन्न हलमा पुगेर दर्शकसँग साक्षात्कार गरेको थियो ।
चलचित्रले सशस्त्र जनयुद्धका एक पूर्वमाओवादी कमान्डरको कथालाई केन्द्रमा राखेको छ । युद्धका घाइते र कर्णाली जस्ता दुर्गम क्षेत्रका जनताले ‘सिटामोल’ जस्तो सामान्य औषधि समेत नपाउने मार्मिक यथार्थलाई चलचित्रले प्रस्तुत गरेको छ ।
नेकपा (एमाले) निकट विद्यार्थी संगठन अनेरास्ववियुका अध्यक्ष डा. सुजन कडरिया लगायतको टोलीले पनि चलचित्र हेरेपछि यसले राज्यलाई कर्णालीको अवस्थाबारे गम्भीर सन्देश दिएको बताएको छ ।
चलचित्रले २०६२/६३ को सशस्त्र जनयुद्धका घाइते योद्धा र कर्णालीका जनताले भोग्नुपरेको सिटामोल जस्तो सामान्य औषधिको अभावलाई सूक्ष्म ढंगले प्रस्तुत गरेको प्रतिक्रिया दिए । चलचित्रले राज्यको ध्यान कर्णालीको यथार्थ अवस्थातर्फ ध्यानाकर्षण गराएको उनीहरुको भनाइ छ ।
चलचित्रले एक पूर्वमाओवादी कमान्डरको कथालाई केन्द्रमा राखेको छ । जनयुद्धको विषयवस्तु उठाएकाले धेरै दर्शकले चलचित्रसँग भावनात्मक रूपमा जोडिएको र कतिपय दृश्यमा भावुक बनेको बताएका छन् ।
दर्शकको प्रतिक्रियाले कलाकार तथा निर्माण टोली उत्साहित बनेका छन् । अभिनेता सौगात मल्लले दर्शक भेट्न हिँड्नु परेकाले मैले आफैँ पुरै सिनेमा हेर्न पाएको छैन । तर सबैको प्रतिक्रिया सुनेरै खुसी लागेको र आफ्नो मेहनत सफल भएको महसुस गरेको बताए ।
अभिनेता मल्लले भने, “सबैको प्रतिक्रिया सुनेर खुसी लागेको छ । दर्शकले मन पराइदिनु भएपछि हाम्रो मेहनतले रंग पाएको छ ।”
त्यस्तै, अभिनेत्री बेनिशा हमालले दर्शकको प्रतिक्रियाले आफूलाई धेरै उत्साहित बताइन् । उनले भनिन्, “दुईवटा सिनेमा एकैपटक आउँदा कस्तो प्रतिक्रिया आउला भन्ने डर थियो । तर, ‘सिटामोल’ जस्तो मर्मस्पर्शी सिनेमालाई दर्शकले रुवाएको प्रतिक्रिया दिँदा आनन्द मिलेको छ ।”
यस चलचित्रको कथा निर्देशक साने र प्रदीप भारद्वाजले लेखेका हुन् । चलचित्रमा सौगात र बेनिशाका अलावा श्री कृष्ण निरौला, जानुका विश्वकर्मा, लोकेन्द्र लेखक, भुगोल कार्की, हिउँवाला गौतम, सुशील पोखरेल लगायतका कलाकारको अभिनय रहेको छ । श्री कृष्ण र जानुकाले यसै चलचित्रबाट डेब्यु गरेका हुन् ।
तुल्सी देवी फिल्मस् प्रा.लि.ले जुनतारा फिल्मस्को सहकार्यमा निर्माण गरेको यो चलचित्रका प्रस्तुतकर्ता सिमोस सुनुवार हुन् ।