किन केकीले भनिन्, म धेरै कुरा बिर्सिन थालेको छु, म असन्तुष्ट मान्छे हुँ
काठमाडौं । अभिनेत्री केकी अधिकारीले चलचित्र ‘जनै हराएको मान्छे : सम्बन्धका धागोहरू’मा सानो उमेरमै ठूलो सपना बोकेर काठमाडौं आएकी गाउँले युवतीको भूमिकामा आफू रहेको बताएकी छन् ।
“तर, समय र पस्थितिले उसलाई यस्तो मोडमा लिएर जान्छ, जहाँ मलाई मेरो सपना नै याद छैन । त्यस्ता धेरै महिला आज काठमाडौंमा हुनुहुन्छ,” केकी भन्छिन्, “त्यस्ता महिलामध्ये एक महिलाको पात्र मैले यो चलचित्रमा निभाएकी छु ।”
ट्रेलर हेरेर सपरिवार चलचित्र हेर्न जाने निर्णय दर्शकले गर्नेमा केकी ढुक्क छिन् । पारिवारिक चलचित्र भएकाले सपरिवारसहित ‘जनै हराएको मान्छे : सम्बन्धका धागोहरू’ हेर्न सकिने उनी बताउँछिन् ।
चलचित्र ‘बोक्सीको घर’को बक्स अफिसको प्रेसर आफूले यो चलचित्रमा नलिएको बताइन् । ‘बोक्सीको घर’ले करिब ११ करोड रुपैयाँ ग्रसकलेक्सन गरेको थियो ।
“मलाई ‘बोक्सीको घर’ बक्सअफिस प्रेसर छैन । आकाल म बिर्सिन थालेको छु । स्क्रिन टाइम धेरै भएर हो अथवा उमेर पनि बढ्दै गएर हो,” उनले भनिन्, “त्यसैले पास्टको कुरा बिर्सिन थालेको छु । सबै कुरा बर्सिएर नयाँ प्रोजेक्टमा लाग्ने बानी छ । असफलता पनि बिर्सिने हो । नत्र त काम गर्न सकिँदैन । असफलताको जस्तै सफलताको पनि ह्याङ लिन हुँदैन ।”
नयाँ चलचित्रमा नयाँ पात्र र नयाँ विद्यार्थी भएर काम गर्ने उनी बताउँछिन् । आफू कुनै पनि चलचित्रमा आफूले गरेको काममा सन्तुष्ट नहुने र यसैले आफूलाई अर्को चलचित्रमा अझै धेरै मेहनत गर्न प्रेरित गर्ने केकी बताउँछिन् ।
असन्तुष्ट हुने स्वभाव आफ्नो रहेको र त्यसैले आउने चलचित्रका लागि राम्रो काम गर्नुपर्छ भन्ने प्रेरणा मिल्ने गरेको केकीको भनाइ छ । काम पाउन कठिन नहुने तर त्यसलाई प्रमाणित गर्न गारो रहेको उनी बताउँछिन् ।
“असन्तुष्ट हुन नै मलाई मजा लाग्छ किन भने सन्तुष्ट भएपछि थप राम्रो काम गर्ने रहर र जाँगर हुँदैन,” केकी भन्छिन् ।
चलचित्र ‘जनै हराएको मान्छे : सम्बन्धका धागोहरू’मा उनी भाइका लागि आफ्ना सपनाहरू बिर्सिने पात्रका रूपमा रहेको ट्रेलरले संकेत गरेको छ ।
चलचित्र ‘जनै हराएको मान्छे ः सम्बन्धका धागाहरू’ भदौ ६ गते रिलिज हुँदै छ । हिमाल न्यौपानेले निर्देशन गरेको यो चलचित्रको असोसियट निर्देशकमा ‘प्रेमगीत ३’ अभिनेता मनिष राउत छन् ।
राउतले यसअघि ‘प्रेमगीत ३’ मा मुख्य भूमिका निभाएका थिए भने अहिले निर्देशनतर्फ पाइला चालेका छन् ।
आम नेपाली समाजमा गहिरो गरी गुञ्जिरहेको भावनात्मक र सामाजिक यथार्थमा आधारित रहेको चलचित्रमा मिरुना मगरसँगै विजय बराल, केकी अधिकारी, सुशांक मैनाली, गौरव पहाडी, भोलाराज सापकोटा, रियर राई, तारा शर्मा, भावना खपांगी मगर, रुपेश लामा, सुमन थापालागायतको अभिनय रहेको छ ।
पेपरक्लिपको ब्यानरमा निर्माण भएको चलचित्रका निर्माता कमल न्यौपाने र विमल न्यौपाने हुन् । कार्यकारी निर्मातामा नारायण तिमिसिना, चुडामणि सिवाकोटी, आरके मानन्धर, सिआर बस्नेत, फिलिप डिसी र जेम्स महाराजन रहेका छन् ।
थानेश्वर गौतम, अर्जुन पोखरेल, एसडी योगी र प्रसान्त सिवाकोटीको संगीत रहेको चलचित्रमा नवीन गुरुङ डीओपी र कृष्ण परियारको सिनेमेटोग्राफी रहेको छ ।
चलचित्रको कथा, पटकथा र संवाद भानुभक्त ढकालले लेखेका छन् । दिनेशबहादुर राउत मुख्य सहायक निर्देशक रहेको सिनेमामा तर्कराज न्यौपाने, रवीन्द्र नेपाल, मोनिका थापा र आकाश के.सी सहायक निर्देशक रहेका छन् । चलचित्रका निर्माण नियन्त्रक लक्ष्मणराज पौडेल हुन् ।