‘वार २’मा सेन्सर बोर्डको कैंची, कियारा आडवाणीको बिकिनी दृश्य घटाइयो
काठमाडौं । यस वर्षको बहुप्रतिक्षित बलिउड चलचित्रमध्ये एक ‘वार २’ रिलिजपूर्व नै भारतको केन्द्रीय फिल्म प्रमाणन बोर्ड (सीबीएफसी) को कैँचीमा परेको छ ।
अयान मुखर्जीद्वारा निर्देशित र यशराज फिल्म्सको स्पाइ युनिभर्सको एक हिस्सा रहेको यो चलचित्र अगस्ट १४, २०२५ मा हलमा प्रदर्शन हुँदैछ ।
ऋतिक रोशन र जूनियर एनटीआरको पहिलो पटकको जोडी देखिने ‘वार २’ यसअघिका चलचित्र ‘सिलसिला’ र ‘ठग्स अफ हिन्दुस्तान’पछि यशराज फिल्म्सको यो सबैभन्दा ठूलो कास्टिङ भएको सिनेमा मानिएको छ ।
बलिउड हंगामाको रिपोर्ट अनुसार भारतीय सेन्सर बोर्ड ‘सीबीएफसी’ले ‘वार २’को एक्सन दृश्यमा कुनै कैँची नचलाएपनि केही संवाद र दृश्यमा काटछाँट गर्न निर्देशन दिएको हो ।
सीबीएफसीले ‘वार २’का निर्मातालाई अश्लील संवाद परिवर्तन गर्न र एक पात्रले गरेको २ सेकेन्ड लामो अश्लील इशारा हटाउन भनिएको छ । कियारा आडवाणीको बिकिनी अवतार रहेको ‘आवाँ जवाँ’ गीतको ९ सेकेन्ड लामो कामुक दृश्यलाई पनि ५० प्रतिशतले घटाउन भनिएको छ । साथै, यी बाहेक ६ स्थानमा अनुपयुक्त सन्दर्भहरूलाई म्युट गर्न पनि लगाइएको छ ।
काटछाँटपछि ‘वार २’ ले U/A १६+ रेटिङ पाएको छ । सेन्सर प्रमाणपत्रअनुसार यसको रनटाइम १७९.४९ मिनेट (२ घण्टा ५९ मिनेट ४९ सेकेन्ड) रहेको छ ।
यो फिल्मको अग्रिम बुकिङ १० अगस्ट २०२५ बाट सुरु हुनेछ । यद्यपि, ‘वार २’ एकल रिलिज हुनेछैन, किनकि सोही दिन यो रजनीकान्तको ‘कुली’सँग बक्स अफिसमा भिड्नेछ ।