श्रीमान् श्रीमतीको सम्बन्धको कथामा ‘ताराहरू’को ट्रेलर
काठमाडौं । आशान्त शर्मा निर्देशित चलचित्र ‘ताराहरू’को ट्रेलर सार्वजनिक गरिएको छ । ट्रेलरमा मध्यमवर्गीय परिवारले शहरमा जीवन गुजार्नका लागि गर्नुपरेको संघर्षको कथा देखाइएको छ ।
निर्देशक शर्माकै कथा रहेको यो चलचित्रमा श्रीमान् श्रीमतीको सम्बन्धको कथामा आधारित छ ।
चलचित्रमा निर्देशक स्वयं आशान्त शर्मा र अभिनेत्री मेनुका प्रधान मुख्य भूमिकामा छन् । यसअघि क्लासिक पात्रको चरित्रहरूमा देखिदै आएकी मेनुका यो सिनेमामा पृथक् चरित्रमा देखिएकी छन् । उनी यसमा सामाजिक/संस्कृतिक रूढीहरू वा परम्परागत अपेक्षामा नबाँधिने, अनौपचारिक तरिकाले जीवन बिताउने पात्रको स्वरुपमा देखिएकी छन् ।
आगामी भदौ ६ गतेदेखि देशभर प्रदर्शनमा आउने चलचित्रमा आभास अधिकारी, मिरा खड्का, कुन्दुन शाक्य, प्रभाकर न्यौपाने, राज पंगेनी शर्मा, प्रमोद यादव, अञ्जली शाह, पुस्कर गुरुङलगायत कलाकारको पनि अभिनय गरेका छन् ।
यसअघि यो चलचित्रका ‘ऐया नि हो’ र ‘जाम त भने कुन बाटो जाम त’ बोलका गीत तथा टिजर सार्वजनिक भइसकेका छन् ।
सरद महतोको छायांकन तथा विनोद पाण्डेको सम्पादनमा बनेको फिल्म वेज प्रा.लि.को प्रस्तुति हो । निर्माणतर्फ गोपिनी शेडाइँ र कृष्ण प्रसाद पंगेनी शर्मा मुख्य निर्माता हुन् भने सह–निर्मातामा घनलक्ष्मी शाक्य, जगविजय पंगेनी शर्मा र युगविजय पंगेनी शर्मा छन् ।