भाइटीकामा दयाहाङ र विजयको ‘वरिष्ठ बलराम’
काठमाडौं । सुरेन्द्र पौडेलको निर्देशनमा निर्माण भएको चलचित्र ‘वरिष्ठ बलराम’ भाइटीकामा रिलिज हुने भएको छ ।
विशेष स्रोतका अनुसार यो चलचित्रलाई कार्तिक ६ गते भाइटीकामा रिलिज गर्न लागिएको बुझिएको छ । यसअघि ‘टाइटल टिजर’ भिडियो सार्वजनिक गर्दै निर्माताले यो सिनेमा कात्तिक ३ गते लक्ष्मी पूजाका दिन आउने जनाएका थिए ।
अहिले पोस्ट प्रोडक्सनमा रहेको यो चलचित्रलाई ३ दिनपछि सारेर भाइटीकामा रिलिज गर्न लागिएको स्रोतको भनाइ छ ।
चलचित्र ‘वरिष्ठ बलराममा दयाहाङ राई, विजय बराल, समृद्धि अर्याल, पशुपति राई, माओत्से गुरुङलगायत कलाकारको अभिनय छ ।
यो चलचित्र सुरेन्द्र पौडेलको चौथो निर्देशकीय सिनेमा हो । दृश्य सम्पादक समेत रहेका पौडेलले यसअघि ‘आभाष’, ‘क्रृ’ र ‘बाबरी’ निर्देशन गरेका छन् ।
निर्देशक पौडेलकै कथा र सम्पादन रहेको चलचित्रको पटकथा महेश दवाडीले लेखेका हुन् ।
वृषभ सिद्धी इन्टरटेनमेन्टको प्रस्तुतिमा आन्भी फिल्मस्को सहकार्य रहेको चलचित्रमा आशिष एच तामाङ र श्रीराज कार्की निर्माताका रूपमा छन् ।
सामाजिक कथावस्तुमा आधारित ‘वरिष्ठ बलराम’को छायाकंन चितवनका विभिन्न स्थानमा छायाकंन गरिएको हो ।
मनकृष्ण महर्जनको छायांकन रहेको फिल्ममा तारानाथ न्यौपाने मुख्य सहायक निर्देशक, प्रशान्त शिवाकोटीको संगीत, सम्राट शाक्यको एक्सन निर्देशन, प्रदीप लामाको नृत्य निर्देशन छ ।
यो चलचित्रलाई काठमाडौँँ उपत्यकामा डीसिएन र उपत्यका बाहिर कुवेर सिने डिस्ट्रीव्युसनले वितरण गर्नेछ ।