सिम्पलको यो गीतले ‘कुटुमा कुटु’लाई पनि उछिन्यो (भिडियो)
काठमाडौं । नेपाली गायिका तथा मोडल सिम्पल खरेलले युट्युबमा नयाँ रेकर्ड कायम गरेकी छन् । उनको हिन्दी भजन ‘राधा रानी लागे’ले दर्शकमाझ पाएको अपार लोकप्रियताले उनलाई नेपाली कलाकारमध्ये सर्वाधिक भ्युज पाउने कीर्तिमानधारी बनाएको छ ।
२२ करोड ५१ लाख ३५ हजार ७ सय भन्दा बढी भ्युज पाएको नेपाली गीत ‘कुटुमा कुटु’को रेकर्डलाई समेत पछाडि पार्दै ‘राधा रानी लागे’ले दुई वर्षको छोटो अवधिमा २२ करोड ९७ लाख ५१ हजारभन्दा बढी भ्युज हासिल गरेको छ । यो उपलब्धिसँगै सिम्पलले युट्युबमा सर्वाधिक दर्शकले हेरेको गीत सार्वजनिक गर्ने पहिलो नेपाली कलाकार बन्न सफल भएकी छन् ।
यो भजन सिम्पलको आफ्नै युट्युब च्यानलमार्फत सार्वजनिक भएको हो । धार्मिक भावनाले भरिएको गीत नेपाल मात्र नभई भारत र विश्वका अन्य मुलुकका दर्शकसमेतले मनपराएका छन् ।
सिम्पल खरेलका अन्य भजन गीतहरूले पनि उत्तिकै चर्चा पाएका छन् । भजनमार्फत उनले नेपाल र भारतमा आफ्नो सशक्त पहिचान बनाउनुका साथै नेपाली कलाकारको उपस्थितिलाई अन्तर्राष्ट्रिय स्तरसम्म पुर्याएकी छन् ।
यो उपलब्धिले नेपाली कलाकारहरू धार्मिक तथा सांस्कृतिक गीतमार्फत पनि विश्वव्यापी सफलता पाउन सक्ने तथ्यलाई फेरि एकपटक प्रमाणित गरेको छ ।