‘माग्ने राजा’मा केदारलाई निर्माताले खाली चेकमा आफ्नो पारिश्रमिक आफैँ लेख्न भनेका थिए
काठमाडौं । चलचित्र ‘माग्ने राजा’ केदार घिमिरेले छानेको चौथो कथामा बनेको चलचित्र भएको निर्माता मुनाल घिमिरेले बताएका छन् ।
अगाडिका तीनवटा स्क्रिप्ट चित्त नबुझाएका उनले चौथो स्क्रिप्ट फाइनल गरेका थिए ।
“यो भन्दा अलि राम्रो कथामा काम गरौँ न भन्दाभन्दै यो चौथो स्क्रिप्ट हो,” मुनालले भने, “उहाँले मलाई सुहाउने कथा भए राम्रो हुन्थ्यो भन्नुभयो । उहाँ आफैँले एउटा पैसा नभएको गरिब व्यक्तिले एक्कासी धेरै पैसा पायो भने कसरी खर्च होला, यो कथा कस्तो हुन्छ होला भन्नुभयो ।”
केदारले यो स्टोरी सजेस्ट गरेपछि मोहित र निर्देशक ऋषि लामिछाने लेखक सामिप्यराज सिमलसिनेमाकोमा पुगे । “हामीले यस्तो कथा छ, स्क्रिप्ट बन्छ भन्यौँ । सामिप्य सरले यसमा राम्रो स्क्रिप्ट बन्छ भन्नुभयो,” उनी भन्छन्, “त्यसपछि बल्ल केदारजीले यो चलचित्र साइन गर्नुभएको हो ।”
मुनालले केदारलाई खाली चेकमा साइन गर्न भनेको स्मरण गरे । “उहाँ केदारजी दाङमा आएका बेला खाली चेक निकालेर ल अहिलेको हिरोको बजार भाउ अनुसार तपाईं यो खाली चेकमा कति पारिश्रमिक लिनुहुन्छ, लेख्नुस् म साइन गर्दिन्छु भनेँ,” मुनाल भन्छन्, “तर उहाँले खाली चेकमा रकम लेख्नु भएन । पहिला स्क्रिप्ट हेरर काम गरौँ भन्नुभयो । खाली चेकमा रकम लेख्नु भएन ।”
आफूले राम्रो चलचित्र बनोस् भनेर नै कथामा काम गरौँ भनेर पटकपटक भनेको केदारले बताए । चलचित्र राम्रो हुन सबैभन्दा धेरै कथामै काम गर्नुपर्ने र कथा नै सिनेमाको सबैभन्दा ठूलो पिलर भएको केदारको भनाइ छ ।
‘माग्ने राजा’ आगामी भदौ ६ गतेबाट रिलिज हुनेछ । सिनेमाले मुलुकको सामाजिक, आर्थिक र राजनीतिक परिस्थिति देखाउनेछ ।
आरम्भ प्रोडक्सनको ब्यानरमा निर्माण भएको सिनेमाका प्रस्तुतकर्ता तथा निर्माता मुनाल घिमिरे हुन् । ‘इच्छा’ रिलिजको लामो समयपछि सिनेमा निर्माणमा फर्केका छन् । निर्माता घिमिरे हाल दाङको घोराही उपमहानगरपालिका वडा नम्बर ४ का वडा अध्यक्ष समेत हुन् ।
नरेन्द्र मैनालीले खिचेको सिनेमामा अभिनेता आर्यन सिग्देलको पनि विशेष भूमिका रहेको छ । आरआर फिल्मसले वितरण गर्ने सिनेमामा सामीप्यराज तिमल्सेनाको कथा, पटकथा तथा संवाद र दीपक शर्मा बाबुल गिरीको संगीत रहेको छ ।