विजय बराल भर्सेस माग्ने बुढा, कसले मार्ला बक्सअफिसमा बाजी ?
काठमाडौं । भदौ ६ गते दुईवटा नेपाली चलचित्र रिलिज हुँदा एउटा अनौठो त होइन तर केही फरक दृश्य भने देखिनेछ ।
बजारमा अहिले चर्चामा रहेका दुई कलाकार आमनेसामने हुनेछन् । ती हुन् केदार घिमिरे र विजय बराल ।
केदार घिमिरे लगातार ‘छक्का पञ्जा’ सिरिजलाई हिट बनाउने बलाकार हुन् । यो सिरिजमा दीपकराज गिरी जति धेरै लोकप्रिय छन्, त्यति नै केदार घिमिरे पनि छन् । कतिपय त केदारकै कारण ‘छक्का पञ्जा’ चल्यो भन्ने पनि छन् । केदारबिना ‘छक्का पञ्जा’ बनाएर चलाएर देखाउन दीपकलाई चुनौती दिने कमेन्टहरू आउने गरेका छन् ।
केदार घिमिरेको पहिलोपटक लिड रोलमा रहेको र ‘छक्का पञ्जा’ बाहिरको चलचित्र हो ‘माग्ने राजा’ । त्यसैले पनि चर्चामा छन् केदार र ‘माग्ने राजा’ । अर्कातिर उनले लिएको भनिएको ६१ लाख पारिश्रमिकले पनि उनी चर्चामा छन् ।
६ गते नै ‘पूर्ण बहादुरको सारङ्गी’बाट चम्किएका अभिनेता विजय बरालको चलचित्र ‘जनै हराएको मान्छे : सम्बन्धका धागाहरू’ रिलिज हुँदैछ ।
‘जनै हराएको मान्छे : सम्बन्धका धागाहरू’ चलचित्र ‘पूर्ण बहादुरको सारङ्गी’ पछि विजयले सोलो लिड गरेको चलचित्र हो । ‘पूर्ण बहादुरको सारङ्गी’को रापतापका कारण यतिबेला विजयको माग बजारमा उच्च छ । उनी पनि लगातार चलचित्र छोडिरहेका छन् ।
मुख्य भूमिकामा नै लगातार अफर आए पनि समय अभावका कारण विजयले चलचित्र छोडिरहेका छन् । त्यसैले ‘पूर्ण बहादुरको सारङ्गी’ पछि लिड रोलमा रहेको विजयको चलचित्र ‘जनै हराएको मान्छे : सम्बन्धका धागाहरू’ प्रदर्शनमा आउन लागेकाले यसको व्यापार कस्तो होला र सिनेमा कस्तो होला भन्नेमा धेरैले चासोपूर्वक हेरिरहेका छन् ।
बजारमा रुचाइएका यी दुई पात्रका एकै दिन चलचित्र रिलिज हुँदा माग्ने भर्सेज विजय बराल हुने भएको छ । ‘माग्ने राजा’ कमेडी जनरमा छ भने ‘जनै हराएको मान्छे : सम्बन्धका धागाहरू’ सोसल ड्रामा हो । यसले बाउ र छोराबीचको इमोस्नल कथा भन्नेछ । यी दुवै अहिले नेपाली सिने बजारमा दर्शकले रुचाएका जनरा हुन् । त्यसैले बक्सअफिसमा कसले बानी मार्छ भन्ने धेरैमा कौतुहलता छ ।