‘माइतीघर’को शीर्ष गीतमा नृत्य गरेर ५ लाख जित्ने मौका
काठमाडौं । दशैंको फूलपातीको अवसर पारेर असोज १३ गतेदेखि देशभर प्रदर्शनमा आउन लागेको चलचित्र ‘माइतीघर’को प्रचार–प्रसार धमाधम भइरहेको छ । निर्माण पक्षले रिलिज मितिसम्म देशव्यापी रूपमा आक्रामक मार्केटिङ अभियान अघि बढाइरहेको छ ।
चलचित्रका प्रस्तुतकर्ता रोहित अधिकारीले प्रचारमा कुनै कमी नगर्ने अठोट व्यक्त गर्दै राजधानीदेखि ग्रामीण शहरसम्मका हलहरूमा ठूला पोस्टर टाँस्नेदेखि प्रमुख स्थानहरूमा होर्डिङबोर्ड राख्ने अभियान सञ्चालन गरेका छन् । साथै, डिजिटल माध्यमबाट पनि दर्शकलाई आकर्षित गर्न विभिन्न कार्यक्रम ल्याइएका छन् ।
यसै क्रममा भारतीय गायिका सञ्जिवनीको स्वर रहेको चलचित्रको शीर्ष गीतमा आधारित नृत्य प्रतियोगिता घोषणा गरिएको छ, जसको विजेता व्यक्ति वा समूहलाई ५ लाख रुपैयाँ नगद पुरस्कार प्रदान गरिनेछ ।
निर्माण पक्षका अनुसार भदौको पहिलो साता सार्वजनिक हुने ‘बसन्त नै बस्न खोज्छ यहाँ लोलायर’ बोलको गीतमा ४० सेकेन्डदेखि २ मिनेटसम्मको भिडियो तयार पारेर ओएसआर डिजिटलको आधिकारिक इमेल [email protected] मा पठाउनुपर्नेछ ।
पठाइएका भिडियोहरू ओएसआर डिजिटलका युट्युब, फेसबुक र टिकटक खाताबाट सार्वजनिक गरिनेछन् । तीमध्ये सर्वाधिक भ्यूज पाउने र उत्कृष्ट कोरियोग्राफी प्रस्तुत गर्ने भिडियोलाई छनोट गरेर पुरस्कार दिइनेछ । सहभागीहरूले भदौ २० गतेसम्म भिडियो पठाइसक्नुपर्नेछ भने विजेताको नाम असोज १२ गते सार्वजनिक गरिने र सोही दिन पुरस्कार हस्तान्तरण गरिने निर्माण पक्षले जनाएको छ ।
मिलन तामाङ निर्देशित ‘माइतीघर’मा धिरज मगर, केदार घिमिरे, प्रकाश सपुत, उपासना सिंह ठकुरी, श्यामाश्री शेर्पा, युवराज लामा, वुद्दि तामाङ, शिशिर वाङ्देल, रजनी गुरुङ, सन्तोष शाही, फूलकुमार बमजम, संगीता थापा लगायतका कलाकारको अभिनय रहेको छ ।
चलचित्रमा चन्द्रकुमार दोङको कथा, सुशन प्रजापतिको डोआपी, रामशरण पाठकको पटकथा तथा संवाद, सुरेन्द्र पौडेलको सम्पादन, किरण खरेल, कुमार स्याङ्बा र राम अविरलका गीत, चन्द्रकुमार दोङ, एलिस कार्की, एसडी योगी र स्वर्गीय जयदेवको संगीत, र अष्ट महर्जनको एक्सन समावेश छन् ।
रविन शेरचन र धिरज तामाङको लगानीमा तयार भएको चलचित्रका कार्यकारी निर्माता ईश्वर श्रेष्ठ र निरज कटुवाल हुन् ।