लक्ष्मण सुवेदीको ‘सतीदेवी’ अमेरिकामा विशेष प्रदर्शन हुँदै
काठमाडौं । लक्ष्मण सुवेदीको लेखन, निर्माण र निर्देशनमा बनेको नारीप्रधान चलचित्र ‘सतीदेवी’को आगामी शनिबार (साउन ३१ गते) अमेरिकाको भर्जिनीयामा बिशेष प्रदर्शनी हुने भएको छ ।
महिलाहरुको महान पर्व तीजको अवसर पारेर नारी सम्मानको भावना सहित यो शो आयोजना गर्न लागिएको हो ।
कार्यक्रमका संयोजक तथा चलचित्र निर्माता पुष्कर पन्तले लामो समयदेखि अमेरिकामा बसोबास गर्दै आए पनि आफू नेपाली चलचित्र निर्माण, कलाकारिता र समाजसेवामा सक्रिय रहँदै आएको र यसपटक ‘सतीदेवी’ जस्तो मौलिक र पारिवारिक चलचित्रलाई प्रवासी नेपाली दर्शकमाझ पुर्याउन लागिएको बताए ।
पन्तले भने, “यो चलचित्रबारे धेरै प्रशंसा सुनेका छौं । यस प्रकारका मौलिक र परिवारमै बसेर हेर्न सकिने नेपाली चलचित्र अझै बन्ने र धेरैभन्दा धेरैले हेर्नुपर्ने हाम्रो मान्यता हो । जहाँ भए पनि नेपाली कला, संस्कृति, मौलिकता र आफ्नोपन जोगाइराख्न हामी सबैले आफ्नो तर्फबाट पहल गर्नुपर्छ, त्यसकै हिस्सा स्वरूप यो बिशेष शो आयोजना गरेका हौं ।”
निर्देशक एभरेष्ट सूर्य बोहरा निर्देशित हिट फिल्म ‘ठूली’ का निर्माता समेत रहेका पन्तका अनुसार ‘सतीदेवी’ हेर्न आफू र टोली निकै उत्साहित छन् ।
‘सतीदेवी’ले चलचित्र बिकास बोर्डद्वारा आयोजित राष्ट्रिय चलचित्र अवार्ड–०८० मा “बिशेष चलचित्र” पुरस्कार जितिसकेको छ । यसअघि पनि यसले राष्ट्रियसहित एक दर्जन उत्कृष्ट अवार्डहरु हात पारेको छ ।
चलचित्र ‘सतीदेवी’मा मलिका महत, रमेश बुढाथोकी, सन्दिपबाबु लोहनी, कुलबहादुर अधिकारी, सृजना अधिकारी, बालकलाकार हर्षिका वली र मञ्जिला बानीयाँलगायत कलाकारको दमदार अभिनय छ।
दिलासा कृएसनको प्रस्तुति र गोल्डेन स्टेट मुभी मेकर्स एलएलसी क्यालिफोर्नियाको सहकार्यमा बनेको यो चलचित्रका निर्मातामा दिलासा सुवेदी, सारा सुवेदी, श्रीदेवी सुवेदी र बिशाल सुवेदी छन् ।
निर्देशक सुवेदीका अनुसार भर्जिनीयामा हुने बिशेष शोपछि अमेरिकाका अन्य स्टेटहरूमा पनि ‘सतीदेवी’ प्रदर्शन गरिने तयारी भइरहेको जानकारी दिए ।