‘महावतार नरसिंह’को कमाइको रफ्तार रोकिएन, दोहोरो शतक पार गर्दै बनायो नयाँ रेकर्ड
काठमाडौं । दक्षिण भारतीय एनिमेटेड चलचित्र ‘महावतार नरसिंह’ ले आफ्नो बक्स अफिस यात्रा धमाकेदार रूपमा जारी राखेको छ ।
२५ जुलाईमा रिलिज भएको यो चलचित्रले रिलिजको तेस्रो सातामा समेत व्यापारमा कुनै कमी देखाएको छैन र सन् २०२५ को सबैभन्दा धेरै कमाउने सिनेमामध्ये एकको रूपमा उभिएको छ ।
अश्विन कुमार निर्देशित यो चलचित्रले रिलिजको १७ औं दिनसम्म भारतमा मात्र १७४.९० करोड रुपैयाँ आम्दानी गरिसकेको छ । सोमबार (१७ औं दिन) मात्रै यसले ५.२५ करोडको व्यापार गरेको बक्स अफिस ट्र्याकर सकनिल्कको तथ्यांकमा उल्लेख छ ।
विश्वव्यापी रूपमा हेर्दा चलचित्र ‘महावतार नरसिंह’ ले अहिलेसम्म २ सय १० करोड रुपैयाँ संकलन गर्दै दोहोरो शतक पार गरेको छ । चलचित्रको निर्माण लागत मात्र ४० करोड रुपैयाँ रहेकोमा यसको आम्दानीले निर्माता टिमलाई ठूलो सफलता दिलाएको छ ।
चलचित्र ‘महावतार नरसिंह’ ले भारतमा ‘हनुमान’ र ‘स्पाइडर म्यानः एक्रोस द स्पाइडर भर्स’ जस्ता चर्चित एनिमेटेड फिल्मलाई पछि पार्दै सबैभन्दा धेरै कमाउने एनिमेटेड सिनेमाको कीर्तिमान बनाएको छ । त्यस्तै, विश्वव्यापी कमाइमा यसले पिक्सारको ‘इन्क्रेडिबल्स २’ (२०१८) लाई समेत उछिनिसकेको छ ।
‘महावतार नरसिंह’को कथा भगवान विष्णुको अवतार ‘नरसिंह’मा आधारित छ । ‘क्लेम प्रोडक्सन’को ब्यानरमा शिल्पा धवन, कुशल देसाई र चैतन्य देसाईले निर्माण गरेको यो प्रोजेक्टलाई ‘होम्बल फिल्म्स’ले प्रस्तुत गरेको हो । यो चलचित्र हिन्दी र दक्षिण भारतीय भाषाहरूमा २डी र ३डी दुवै संस्करणमा रिलिज गरिएको छ।
निर्माताले ‘महावतार नरसिंह’लाई भगवान विष्णुका १० अवतारमा आधारित श्रृंखलाको पहिलो कडीका रूपमा घोषणा गरेका छन् । यो सफलता पछिसँगै यस फ्रेन्चाइजको आगामी चलचित्रप्रति दर्शकमाझ उच्च उत्साह देखिएको छ ।