कस्तो भूमिकामा भित्रिइन् ‘आ बाट आमा’मा उषा उप्रेती ?
काठमाडौं । टिकटकमार्फत चर्चामा आएकी मोडल उषा उप्रेतीले हाल म्युजिक भिडियो क्षेत्रमा आफ्नो छुट्टै पहिचान बनाउन सफल भएकी छन् । टिकटकबाट उदाएका कतिपय अनुहार केही समयमै ओझेल परे पनि उषाको भने म्युजिक भिडियोमा निरन्तर माग रहेको छ ।
चलचित्रमा प्रवेश गर्ने योजना बनाएकी उषा केही समयअघि अभिनेता निखिल उप्रेतीको निर्माण तथा निर्देशनमा बन्ने भनिएको ‘आचार्य’मा अनुबन्धित भएकी थिइन् । जेठमा छायांकन सुरु गर्ने तयारी भए पनि उक्त परियोजना हालसम्म सुरु हुन सकेको छैन ।
उनी अहिले निर्देशक चन्द्र पन्तको निर्देशनमा बन्ने नयाँ चलचित्र ‘आ बाट आमा’ मा अनुबन्धित भएकी छन् । बुधबार औपचारिक रुपमा अनुबन्ध भएकी उनले यो चलचित्रमा मुख्य भूमिकामध्ये एक गर्ने निर्माण टिमले बताएको छ ।
निर्माणपक्षले तर उनको पात्रका बारेमा अहिलेसम्म गोप्य राखिएको छ । प्राप्त जानकारी अनुसार यो चलचित्रमा उषा छोटो भूमिका रहने बुझिएको छ ।
यसअघि ‘आ बाट आमा’ मा अभिनेता पल शाह, अभिनेत्री सिमरन पन्त, विपना थापा र दक्षिण भारतीय चलचित्रका चर्चित अभिनेता प्रदीप रावत अनुबन्ध भइसकेका छन् ।
आर्या इन्टरटेन्मेन्टको ब्यानरमा निर्माण हुने यो चलचित्रको छायांकन भदौ महिनादेखि सुरु हुने निर्माण टिमले जनाएको छ ।
चलचित्रको वितरण अधिकार आरआर फिल्म्सले लिएको छ । ‘आ बाट आमा’ देशभर आउँदो फागुन १५ गते प्रदर्शनमा आउने तय भएको छ ।