छैटौं दिनसम्म आइपुग्दा कस्तो छ ‘मोहर’ र ‘सिटामोल’को कमाइ ?
काठमाडौं । शुक्रबारदेखि प्रदर्शनमा आएका दुई नेपाली चलचित्र ‘मोहर’ र ‘सिटामोल’ले सुरुवाती प्रदर्शनमा केही हदसम्म दर्शक चासो जगाए । पहिलो दिन औसत अकुपेन्सी पाए पनि शनिबार भने दुवै चलचित्रले देशभर दर्शकको उपस्थिति वृद्धि भएको अनुभव गरे, जसमा ‘मोहर’ अझ अघि देखियो ।
छैटौं दिनमा प्रदर्शन भइरहेका दुवै चलचित्रको वास्तविक परीक्षा आइतबारदेखि सुरु भएको छ, जहाँ ‘वर्ड अफ माउथ’ अर्थात् दर्शकको प्रचारले नै व्यापारिक भविष्य निर्धारण गरिरहेको छ ।
दर्शक उपस्थिति र प्रतिक्रियाका आधारमा ‘मोहर’ अग्रस्थानमा देखिएको छ भने ‘सिटामोल’को यात्रा अपेक्षाकृत सुस्त देखिएको छ । बक्स अफिसमा ‘मोहर’ले बुधबार रातीसम्म २ करोड १० लाख ७० हजार रुपैयाँ ग्रस कमाइ गरेको छ ।
जहाँ ‘सिटामोल’को कमाइ उल्लेखनीय स्तरमा पुग्न सकेको छैन, जसले यसको व्यापारिक भविष्यलाई ‘वर्ड अफ माउथ’मा अझ बढी निर्भर बनाएको छ । ‘सिटामोल’को कमाइ न्यून रहेको छ ।
ओम प्रतिकको लेखन तथा निर्देशनमा बनेको चलचित्र ‘मोहर’ बाइसे–चौबिसे राज्यकालको ‘देउकी’ कुप्रथामा आधारित कथामा बनेको हो ।
ऐतिहासिक पृष्ठभूमिमा सामाजिक मुद्दा उठाएको चलचित्रमा पल शाह, बेनिशा हमाल, नीति शाह, अर्जुन जंग शाही, लक्ष्मी गिरी, सारा शर्मा, रवीन्द्र झा, मिथिला शर्मा, पवित्रा साकी लगायतको अभिनय छ । ‘मोहर’ का निर्माता चुम्बनजंग शाही हुन् ।
त्यस्तै, राज बहादुर साने निर्देशित चलचित्र ‘सिटामोल’मा सौगात मल्ल, बेनिशा हमाल, श्रीकृष्ण निरौला, जानुका विश्वकर्मा, लोकेन्द्र लेखक, भुगोल कार्की, हिउँवाला गौतम, सुशील पोखरेल, दिनेश रेग्मी, आरआर खड्का, पवन भट्टराई, काजल भुजेललगायत कलाकारको अभिनय छ ।
सिमोस सुनुवार प्रस्तुतकर्ता रहेको यस फिल्मको लेखन राज बहादुर साने र प्रदीप भारद्वाजले गरेका हुन् ।