चलचित्र ‘यानी माया’ निर्माण हुनेमा शंका, के भन्छन् निर्देशक ?
काठमाडौं । निर्माण घोषणा गरिएको चलचित्र ‘यानी माया’ अनिश्चित भएको छ । निर्माण टिमबीच कुरा नमिल्दा चलचित्र निर्माण हुने/नहुने अनिश्चित भएको हो ।
निर्मातामध्येका एकले निर्देशक नै परिवर्तन गर्न खोजेपछि चलचित्र अनिश्चित बनेको हो । निर्माताले निर्देशक परिवर्तन गरेर विकास सुवेदीको विकल्प खोज्ने प्रयास गर्दा प्रोजेक्टको भविष्य अनिश्चित बनेको छ ।
निर्माताले विकास सुवेदीको ठाउँमा अर्कै निर्देशक भित्र्याउन खोजे पनि यो त्यति सजिलो छैन । किन भने निर्देशक विकास नै यो चलचित्रका लेखक पनि हुन् । उनले पनि यही पुष्टि गरेका छन् ।
“हाम्रो क्रिएटिभ पार्टमा केही समस्या देखिएको हो । चलचित्र नै नबन्ने भन्ने होइन,” निर्देशक विकासले भने ।
निर्मातामध्येका एकले निर्देशक परिवर्तन गर्न खोजेका हुन् भन्ने प्रश्नमा विकास भन्छन्, “त्यति सजिलो पनि नहोला । किन भने म निर्देशक मात्रै होइन । स्क्रिप्ट पनि मेरै हो । मेरै स्क्रिप्ट भएकाले मैले छोड्दा कथा पनि मेरै भएकाले कि कथा पनि अर्कै हुनुप¥यो ।”
साउनको दोस्रो साताबाट यो चलचित्र छायांकनमा जाने भनिएको थियो । “अहिले ढोरपाटनको मौसम पनि हामीले भनेजस्तो भएको छैन । सायद मौसम अनुकूल भएपछि हामी कुरा मिलाएर छायांकनमा निस्किने छौँ ।”
विकासको यो भनाइले पनि ‘यानी माया’ प्रोजेक्टलाई अगाडि बढाउन सहज भने छैन । यद्यपि, यो मिल्नै नसक्ने विषय भने होइन ।
यो चलचित्रमा पल शाह, अञ्जना पुनलगायत कलाकार फाइनल भइसकेका थिए ।
‘यानी माया’ पल शाहले आफ्नो ब्यानर ‘पल शाह फिल्म्स’मार्फत निर्माण गर्न लागेको पहिलो प्रोजेक्ट थियो । विकास सुवेदीको लेखन तथा निर्देशन रहने बताइएको थियो । चलचित्र दार्शनिक मेटामोडर्न सिनेमा र पारिवारिक ड्रामाको संयोजन हुने भनिएको थियो ।
यसमा अन्तरपुस्ता द्वन्द्व, आधुनिकता र परम्पराको दोलन, सहरी जीवन र प्रकृतिको संघर्ष जस्ता विषयहरूलाई समेटिने बताइएको थियो ।
यो चलचित्र ढोरपाटन र हङकङमा छायांकन गर्ने तय भएको थियो । चलचित्रका निर्माताहरूमा पल शाहसँगै चन्द्रज्योति आले हरेने बताइएको थियो ।