सिनेम्याटिक फिल दिने ‘बलिदान’को टिजर सार्वजनिक

काठमाडौं । चलचित्र ‘बलिदान’को टिजर सार्वजनिक भएको छ । सन्तोष सेनको निर्देशनमा तयार भएको यस चलचित्रको टिजर सार्वजनिक भएको हाे । दसैँको फूलपातीको दिन प्रदर्शनमा आउने चलचित्रको टिजरको सुरुवातमा देशको एक हिस्सा बैरीहरूको निशानामा परेको र उनीहरूलाई रोक्न असम्भव भएको उद्घोष सुनिन्छ ।
यसैबीच पृष्ठभूमिमा अभिनेता सौगात मल्ल मसाल बोकेर दृढ अडानका साथ उभिएका देखिन्छन् । त्यसपछि अभिनेता हेमन्त बुढाथोकीको आवाज गुन्जिन्छ, जहाँ उनले कालीमाताको चरणमा रगत चढाउँदै बिताएको समय र त्यो बलिदानको अभिनय पूरा भएको भाव व्यक्त गर्छन् । दृश्यमा बुढाथोकी राजसी पहिरनमा देखिन्छन् भने अर्पण थापा सशक्त राजनेताको भूमिकामा छन् ।
अभिनेता समीर भट्टको प्रवेशसँगै टिजरको तानाबाना अझ गहिरो बन्छ। टिजरमा उनलाई ‘एक्सन किङ’को परिचय दिइएको छ र उनले पावरफुल एक्सनका दृश्यहरू प्रस्तुत गरेका छन् । टिजरको अन्त्यमा अन्य कलाकारहरूको छोटो झलकसहित समीरको ठुलो भालासँगको एक्सन दृश्य शीर्षकसँगै दर्साइएको छ ।
यसअघि, अभिनेता समीर भट्टको जन्मदिनको अवसरमा सार्वजनिक गरिएको प्रि-टिजरले देशभक्तिपूर्ण संवाद र दमदार एक्सनका कारण नेपालसहित दर्जन बढी मुलुकमा युट्युब ट्रेन्डिङमा स्थान पाएको थियो । प्रचार अभियानलाई नयाँ उचाइमा पुर्याउँदै निर्माताले ‘बलिदान ब्यानर’ अभियान सञ्चालन गरेका छन्, जसअन्तर्गत देशैभर विशाल ब्यानरहरू टाँगिएका छन् ।
‘आसुसेन फिल्म्स प्रा. लि.’को ब्यानरमा बनेको चलचित्रमा समीर भट्ट, सौगात मल्ल, अर्पण थापा, ऋचा शर्मा, कविता राय, हेमन्त बुढाथोकी, प्रेम पुरीलगायत कलाकारको अभिनय रहेको छ । चलचित्रका निर्माता पवन ब्राडफोर्ड बिस्ट, कार्यकारी निर्माता प्रेम पुरी हुन् ।