‘डबल ट्रिपल’को भविष्य अनिश्चित, दयाहाङ र खगेन्द्रको व्यस्तताले छायांकन नै रोकियो !
काठमाडौं । अशोक शर्माको निर्देशनमा निर्माण हुने भनिएको चलचित्र ‘डबल ट्रिपल’को भविष्य अनिश्चित बनेको छ । यो सिनेमाका मुख्य कलाकार दयाहाङ राई र खगेन्द्र लामिछानेको कार्यव्यस्तताका कारण छायांकन नै रोकिएपछि पूर्वघोषित प्रदर्शन मिति दोस्रो पटक सरेको छ ।
निर्देशक शर्माले भदौ ५ गतेबाट ‘डबल ट्रिपल’को छायांकन सुरु गर्ने योजना बनाएका थिए, तर मुख्य अभिनेतामध्येका खगेन्द्र लामिछाने अर्को सिनेमा ‘क्याप्टेन साब’को छायांकनमा व्यस्त भएकाले समय दिन सकेनन् । उक्त चलचित्रको काम सकिन अझै करिब ३५ दिन लाग्ने अनुमान गरिएको छ ।
यसबीच, खगेन्द्र फुर्सदिला हुँदा अर्का मुख्य अभिनेता दयाहाङ राई भने आफ्नै नयाँ प्रोजेक्टहरूमा व्यस्त हुने निश्चित भएको छ । उनी अहिले ‘कबड्डी ५’ को छायांकनमा केन्द्रीत छन् । त्यसपछि उनी ‘मितज्यू’ र ‘पेन्सनपट्टा’ नामक दुई अन्य सिनेमामा अनुबन्धित भइसकेका छन् । यसैले माघ महिनाअघि दयाहाङले ‘डबल ट्रिपल’लाई समय दिन नसक्ने पक्का भएपछि चलचित्रको छायांकन स्थगित निश्चित बनेको छ ।
यसअघि, गत फागुनमा निर्माण घोषणा गरिएको चलचित्र ‘डबल ट्रिपल’लाई दशैंको फूलपातीमा रिलिज गर्ने लक्ष्य राखिएको थियो । तर, सोही मितिमा अन्य तीन सिनेमासँग जुध्ने भएपछि शर्माले प्रदर्शन मिति सारेर फागुन १ गतेलाई तोकेका थिए । अब माघअघि छायांकन नै सुरु नहुने भएपछि फागुन १ मा पनि फिल्म प्रदर्शन असम्भव भएको छ ।
यो सिनेमामा दयाहाङ र खगेन्द्रका अलावा मिरुना मगर, केकी अधिकारी, राजाराम पौडेल, उदय सुब्बा, विल्सन विक्रम राई, माओत्से गुरुङ, बुद्धि तामाङ, रामप्रसाद खनाल तथा सुरविर पंडितको अभिनय रहनेछ ।
सिनेमाको कथा तथा पटकथा निर्देशक शर्माले राजेश सिटौलासँग मिलेर लेखेका हुन् ।
चलचित्र ‘डबल ट्रिपल’मा शम्भुजित बाँस्कोटाको संगीत, शान बस्न्यातको संवाद, आलोक शुक्लाको छायाँकन, राजु किराँतीको एक्सन तथा सुनिल क्षेत्रीको नृत्य निर्देशन रहनेछ । यस सिनेमाको निर्मातामा किरण शर्मा पौड्याल, किर्ति शर्मा तथा अंकित शर्मा रहेका छन् ।