फिल्म ‘आबाट आमा’को अस्ट्रेलिया र न्युजिल्याण्ड प्रदर्शन अधिकार बिक्री
काठमाडौं । फिल्म ‘आमा बाट आमा’ को अस्ट्रेलिया र न्युजिल्याण्ड प्रदर्शन अधिकार बिक्री भएको छ । हिमारु इन्टरटेन्मेन्ट प्रालीले दुबै देशका अधिकार खरिद गरेको निर्माण पक्षले जनाएको छ । चन्द्र पन्तको निर्देशन, कथा तथा पटकथामा निर्माण हुन लागेको फिल्मलाई विदेशमा समेत उच्च माग बढ्न थालेको हो ।
मातृत्वको संवेदनशील कथा प्रस्तुत गर्ने यो फिल्मको अस्ट्रेलिया र न्युजिल्याण्डमा वितरण अधिकार ‘सोल्ड आउट’ भएको जानकारी दिएको हो । यस बाहेक अन्य देशमा कुराकानी भइरहेको र त्यसबारेमा पनि छिट्टै जानकारी दिने निर्देशक पन्तले बताए ।
यस फिल्ममा पल शाह, उषा उप्रेतीका साथमा अभिनेत्री विपना थापा, सिमरन पन्त र दक्षिण भारतीय फिल्मका चर्चित अभिनेता प्रदीप रावत लगायतको अभिनय रहने छ । उनीहरु यस फिल्मका लागि फाइनल भइसकेका छन् ।
यही महिनाबाट छायांकनमा निस्किने यो फिल्मका अन्य कलाकार तथा प्राविधिकको छनोट कार्य जारी रहेको र छिट्टै टुङ्गो लगाइने निर्माण पक्षले जनाएको छ । यो फिल्म आगामी वर्षको फागुन १५ गतेदेखि देशव्यापी रूपमा प्रदर्शनमा आउनेछ।