‘हरिबहादुरको जुत्ता’को गीत ‘बेला बितेसी’ सार्वजनिक
काठमाडौं । चलचित्र ‘हरिबहादुरको जुत्ता’को गीत ‘बेला बितेसी’ सार्वजनिक भएको छ । निर्माणपक्षले आज प्रकाश सपूत र समीक्षा अधिकारीको स्वर रहेको गीत सार्वजनिक गरेको हो ।
शब्द तथा संगीत पनि प्रकाश सपूतकै छ । गीतले बेलैमा अथवा उमेर छँदै माया लगाउने पर्ने आशय व्यक्त गर्छ । उमेर छँदै माया नलगाए उमेरले डाँडो काटेपछि त्यसको खासै अर्थ नरहने भाव व्यक्त गर्छ ।
गीतको भिडियोमा चलचित्रका मुख्य कलाकारद्वय प्रकाश सपूत र स्वस्तिमा खड्का छन् । ठूलो संख्यामा कोरस प्रयोग गरिएको छ । भिडियोमा निर्माणपक्षले मेहनत गरेको छ । मौसम हिमालीले कोरियोग्राफी गरेका छन् ।
दीपेन्द्र के खनालको निर्देशन गरेको चलचित्र दसैँको फूलपातीमा रिलिज हुँदैछ ।
हरिवंश आचार्य मुख्य भूमिकामा छन् । हरिवंश आचार्य आफ्नै चर्चित टेलिभिजन सिरियल हरिबहादुर क्यारेक्टरमा देखिने छन् ।
चलचित्रमा हरिवंश, प्रकाश र स्वस्तिमासँगै प्रियंका कार्की, हरिहर शर्मा, दिव्य देव, किरण केसी, राजाराम पौडेल, दिनेश काफ्ले, कमलमणि नेपाललगायत कलाकारको अभिनय छ ।
सिनेमालाई सरोज ओली र मोहितवंश आचार्यले निर्माण गरेका हुन् । कृष्णबहादुर थापाले खिचेको सिनेमालाई नकुल खड्काले सम्पादन गरेका छन् ।