‘मैझारो’को विशेष भूमिकामा देखिँदै दयाहाङ, तीर हान्दै गरेको लुक्स सार्वजनिक
काठमाडौं । चलचित्र ‘मैझारो’को छायांकन अन्तिम चरणमा पुग्दा चर्चित अभिनेता दयाहाङ राईको प्रवेश भएको छ । निर्माण पक्षले उनको भूमिकालाई गोप्य राख्दै आए पनि हालै छायांकन सेटबाट उनको ‘लुक्स’ सार्वजनिक गरेको छ ।
सार्वजनिक तस्बिरमा उनी लिम्बू समुदायको परम्परागत भेषमा तीर हानिरहेको अवस्थामा देखिएका छन्, जसले चलचित्रमा उनको भूमिका शक्तिशाली रहने संकेत गर्छ ।
निर्देशक विल्सन बिक्रम राई (तक्मे बुढा)ले दर्शकलाई सरप्राइज दिनका लागि दयाहाङको भूमिकाबारे मौनता साँधेका थिए । चलचित्रको घोषणा हुँदा अन्य कलाकारहरूको नाम सार्वजनिक गरिए पनि दयाहाङको संलग्नता अन्तिम समयमा मात्र खुलाइएको हो, जसले दर्शकको कौतुहलतालाई थप बढाएको छ ।
आर्टखबरलाई प्राप्त जानकारी अनुसार यो चलचित्रमा अभिनेता दयाहाङ विशेष भूमिकामा रहने छन् । यो सिनेमाको छायाकंन अन्तिम चरणमा पुगेको छ । अब धेरै दिन छायाकंन हुँदैन, अभिनेता राईको यसमा विशेष भूमिका हो । केही दृश्य या एउटा गीतमा उहाँलाई देख्न पाइने स्रोतको भनाइ छ ।
कलाकार विल्सन बिक्रमको यो डेब्यु निर्देशकीय सिनेमा हो । उनकै कथा र पटकथामा ‘तक्मे प्रोडक्सन’को ब्यानरमा निर्माण भइरहेको ‘मैझारो’ पूर्वी नेपालको जीवनशैली, संस्कृति र सामाजिक यथार्थमा आधारित मौलिक प्रेमकथा हो ।
गत साउनको पहिलो हप्ताबाट सुरु भएको चलचित्रको छायांकन पूर्वी नेपालको इलामस्थित देउमाई नगरपालिका, पानीटार, जितपुर, साखेजुङ हुँदै पाँचथरका रमणीय स्थलहरूमा गरिएको छ । निर्माण पक्षले फिल्मको छायांकन पनि अन्तिम चरणमा पुगेको जानकारी दिएको छ।
चलचित्रमा दयाहाङका साथै धिरज मगर, मिरुना मगर, दिया पुन, बुद्धि तामाङ, सुनिल थापा, पुष्कर गुरुङ, अभय राज बराल, माउत्से गुरुङ, कविता आले, रजनी गुरुङ, प्रेम सुब्बा, उदय सुब्बा, अनिल सुब्बा, भूपेन्द्र लिङदेन र विशाल लिम्बु जस्ता कलाकारहरूको अभिनय रहने छ ।
चलचित्रमा अनमोल गुरुङ र तोरेम्पा हाङ राईको संगीत छ भने गीतहरूमा राजेश पायल राई, झुमा लिम्बू, मेलिना राई र अस्मिता अधिकारी जस्ता चर्चित गायक-गायिकाहरूको स्वर सुन्न पाइनेछ । सौरभ लामाले छायांकन गरेको यो चलचित्रको वितरण आरआर फिल्म्सले गर्नेछ ।