दयाहाङ राईको देख्यौं, अब प्रकाश सपूतको पालो
काठमाडौं । एकैदिन एउटै कलाकारका दुई फिल्म आउँदा के होला ? एउटै कलाकारका दुई फिल्म एकैदिन रिलिज हुनु पनि नेपाली सिनेमा क्षेत्रमा नौलो कुरा रहेन । हामीले पछिल्लो समय दयाहाङ राईका दुई फिल्म एकैदिन रिलिज भएको देख्यौं । एकपटक होइन, दुई दुई पटक उनका दुई फिल्म एकैदिन रिलिज भए ।
२०८० वैशाख १ गते सुपरहिट चलचित्र ‘जारी’ रिलिज भएको दिन उनको अर्को सिनेमा ‘बिहे पास’ पनि रिलिज भएको थियो भने २०८० सालमै माघ २६ गते उनका अन्य दुई चलचित्र ‘हात्तीछाप’ र ‘दयारानी’ पनि एकैदिन रिलिज भएका थिए ।
यस्तै अनुभव भर्खरै मात्रै अभिनेत्री बेनिशा हमालका दुई सिनेमा ‘मोहर’ र ‘सिटामोल’ पनि एकैदिनदेखि प्रदर्शनमा आए । यो पालो अभिनेता प्रकाश सपूतकहाँ आएको छ । उनका दुई चलचित्र अन्य समयमा होइन्, दसैंको माहोल पारेर फूलपातीदेखि प्रदर्शनमा आउँदैछन् ।
एकातर्फ उनको चलचित्र ‘हरिबहादुरको जुत्ता’ छ भने अर्कोतर्फ चलचित्र ‘माइतीघर’ । ‘हरिबहादुरको जुत्ता’मा हरिवंश आचार्यसहित प्रकाश, स्वस्तिमा खड्का, प्रियंका कार्की लगायतको अभिनय छ । ‘माइतीघर’ मा प्रकाशसहित केदार घिमिरे, धिरज मगर, उपासना सिंह ठकुरी लगायतको अभिनय छ । यतिबेला दुवै सिनेमाको टिमले प्रचारप्रसार गरिरहेका छन् । यो मितिमा यी दुई चलचित्र मात्रै छैनन, अर्को चलचित्र बलिदान पनि प्रदर्शनमा आउँदैछ ।
दयाहाङ राईको सन्दर्भमा दुई चलचित्र एकैदिन आउँदा एउटा मात्र चलेको थियो । बेनिशाको हकमा पनि ‘मोहर’ अग्रस्थानमा देखिँदा ‘सिटामोल’ अपेक्षाकृत हुन नसकेको देखिएको छ । अब, प्रकाश सपूतको हकमा के होला ? यतिबेला चासो बढेको छ । तर नतिजा थाहा पाउनका लागि भने अब दसैं नै कुर्नुको विकल्प भने छैन ।