अनि यसरी फसे प्रकाश सपूत
काठमाडौं । गत वर्ष चैत २२ गते प्रकाश सपूतको चलचित्र ‘वसन्त’ रिलिज हुँदा धेरैको अनुमान थियो, यो सिनेमा वर्षकै हिटमध्येको एक हुनेछ । सिनेमाको राम्रो हाइप पनि थियो । गीत र सिनेमा दुवैमा हिट भएका प्रकाशको आफ्नै सिनेमा झन् धेरे चल्छ भन्ने थियो ।
‘वसन्त’ हिट हुन्छ भन्नेमा प्रकाश स्वयमलाई त हुने नै भयो । झन धेरै विश्वास थियो । आफूले बनाएको सिनेमा विश्वास हुने नै भयो ।
तर, सिनेमा चलेन । समीक्षात्मक रूपमा त गाली खायो नै बक्स अफिसमा पनि निकै कमजोर भयो । लगानी उठाउन सकेन । दर्जनको सेरोफेरो अग्रज कलाकार समेत राखे पनि चलचित्र चलेन ।
यतिबेला सामाजिक सञ्जालमा प्रकाशले निर्मातालाई घर बेचेर पैसा फिर्ता गर्न लागेको भनेर हल्ला चलिरहेको छ । स्रोतका अनुसार यसमा केही सत्यता छ ।
उनले निर्मातालाई सिनेमा रिलिज भएपछि पैसा फिर्ता गर्छु भनेका रहेछन् । अथवा लगानीकर्ता जो थिए उनीहरू प्रोपर लगानीकर्ता थिएनन् । सिनेमा बनाउन पैसा हाल्ने तर सिनेमा चलेर कमाएपछि फिर्ता गर्ने सर्तमा उनीहरूले प्रकाशलाई पैसा दिएका स्रोतको दाबी छ ।
तर, सिनेमा नचलेपछि यतिबेला प्रकाशलाई निर्माताको पैसा फिर्ता गर्नुपर्ने भएको छ । त्यसैले उनले घर बेचेर निर्मातालाई पैसा फिर्ता गर्दैछन् भन्ने हल्ला चलेको हो ।
तर स्रोतका अनुसार उनी घर नै बेच्ने मनस्थितिमा छैनन् । जसोतसो पैसा फिर्ता गर्ने तयारीमा छन् ।
समान्यतया निर्माताले सिनेमा डुब्दा निर्देशकसँग पैसा फिर्ता लिँदैनन् । डुबे पनि निर्माता कै र कमाए पनि निर्माता कै हुन्छ । तर, सम्झौता नै लगानी डुबे फिर्ता गर्छु भनेर गर्दा प्रकाश अहिले पैसा फिर्ता गर्नुपर्ने अवस्थामा पुगेका हुन् ।
गत चैत्र २२ गते रिलिज भएको चलचित्रमा प्रकाससँगै स्वस्तिमा खड्का, प्रभात पाल ठकुरी, श्री शिभान्सी, उर्मिला लाम्गादे र खड्क बहादुर पुन (खबपु), अनुप बराल, कमलमणी नेपाल, प्रकाश घिमिरे, विशाल पहारीको अभिनय रहेको थियो ।
गलबन्दी प्रोडक्सनको प्रस्तुति रहने सोसल ड्रामा सिनेमामा कथा, पटकथा र संगीत पनि प्रकाशकै थियो ।
प्रकाशले निर्देशन गरेको सिनेमाका निर्मातामा मोहन विश्वकर्मा, अनुरोध भट्टराई, नाना थकाली र विरेन्द्र नारायण श्रेष्ठ थिए ।