‘माग्ने राजा’: बाहिरी ड्रामाले दर्शकलाई के फाइदा भो ?
काठमाडौं । केदार घिमिरे माग्ने बूढाको पहिलो सोलो फिल्मका रुपमा रहेको चलचित्र ‘माग्ने राजा’ अहिले रिलिज हुनुअघि नै हेडलाइनमा छ । तर यो चर्चा फिल्मकै कारण भन्दा पनि निर्माणको विभिन्न फण्डाका कारण भएको छ ।
पर्दा मुनि भन्दा पर्दा बाहिरको फन्डा र विवादकै कारण बढी हेडलाइन बटुलिरहेको यो चलचित्रले सुटिङको समयदेखि नै विभिन्न फन्डाका कारण चर्चामा रहँदै आएको छ । कलाकारलाई ६१ लाख पारिश्रमिक दिएको खबरले एक समय बजार तताएर ध्यान तान्न खोज्यो ।
यसबीच निर्माण टिम आफैंले कहिले हदबाहिरको खर्च, कहिले ‘बक्स अफिस हिट’को दाबी गर्दै फन्डा चलाउँदै आएको छ । अब भने मिस पविको विवादले यसलाई झन् ठूलो ड्रामा बनाइदिएको छ ।
माग्ने बूढाले पारिश्रमिकबारे मिडियामा आएका कुरा असत्य भएको स्पष्ट गरिसके पनि, मिस पविको अभिव्यक्तिले निर्माण टिम र उनीबीचको तिक्तता झन् बढाएको देखिन्छ ।
हालै बाहिरिएको समाचारमा मिस पविले शुटिङमा ५०० सम्म टेक लिएको उल्लेख थियो । तर, निर्माण पक्षले यो समाचारलाई अस्वीकार गर्दै “एकै दिनमा ५०० टेक असम्भव कुरा हो” भन्दै यसलाई हल्ला मात्रै भएको बताएको छ । टिमले विभिन्न औपचारिक कार्यक्रममा पटक–पटक स्पष्टीकरण दिँदै आएका छन् ।
फिल्मबाट निकालिएको खबर सार्वजनिक भएपछि मिस पविले आफूलाई अपमानित महसुस गरेको भन्दै सार्वजनिकरुपमा आक्रोश पोखिन् । उनले अन्तर्वार्तामा “थुकेको थुक नचाट्ने भएकाले ‘माग्ने राजा’ फिल्म हेर्ने नै छैन” भनेर स्पष्ट घोषणा गरिन् ।
मिस पविको नजिकका स्रोतका अनुसार उनलाई फिल्मबाट हटाउने निर्णयबारे पूर्वजानकारी नदिई मिडियामा खबर बनाइएकोले चित्त दुखेको छ । यही कारणले उनी अझै निर्माण पक्षसँग सम्पर्कमा आउन चाहेकी छैनन् । टिमले बारम्बार फोन गर्दा पनि उनले उठाएकी छैनन् भन्ने खबर छ । फिल्मबाट हटाएको भनेर समाचार आए पनि उनी ट्रेलरमा देखिएकी छन् । निर्देशकले पनि उनी चलचित्रमा रहेको बताएका छन् । त्यसैले निकालिएको भन्दा पनि सिन कम भएको बुझिएको छ ।
चलचित्रको व्यापारलाई नै मिस पविको अभिव्यक्तिले असर गर्ने सम्भावना देखिएपछि निर्माण टिमले मिस पविसँग बसेर छलफल गर्न पनि खोजेको थियो । तर, मिस पवि सम्पर्कमै आउन नचाहिरहेको निर्माण टिमका एक सदस्यले बताए । ती सदस्यले भने, ‘‘मिडियामा त्यसरी अभिव्यक्ति दिँदै हिँड्नुभएपछि हामीले सम्पर्क गरेर मनमुटाव सुल्टाउन खोजेको हो । उहाँ सम्पर्कमा आउन खोजिरहनुभएको छैन ।’’
‘माग्ने राजा’ भोलिबाट ‘जनै हराएको मान्छे : सम्बन्धका धागाहरू’ र ‘ताराहरू’ चलचित्रसँग प्रतिस्पर्धामा उत्रिँदैछ । चलचित्र ‘माग्ने राजा’लाई प्रश्न यही छ – फन्डा–फसाद र विवादले फिल्मलाई हिट बनाउने हो कि दर्शकलाई अझै टाढा लैजाने ?
यो विवाद र फन्डा फिल्मलाई अतिरिक्त प्रचार दिलाउने हो वा नकारात्मक प्रभाव पार्ने हो भन्ने प्रश्न भने अझै खुलै छ । यो विवादले अब फिल्मलाई सुपरहिट बनाउँछ कि सुपरफ्लप, अब त दर्शककै हातमा छ ।