प्रिमियरमा कस्तो पायो प्रतिक्रिया फिल्म ताराहरुले ?
काठमाडौँ । आशान्त शर्मा निर्देशित फिल्म ताराहरुको बुधबार राजधानीमा प्रिमियर शो गरिएको छ । कलाकार, लेखक, समाजसेवीलगायतको सहभागिता रहेको शोमा फिल्मले राम्रो प्रतिक्रिया पाएको छ ।
फिल्म सकिएलगत्तै कलाकार कर्मा शाक्यले फिल्म सकिएलगत्तै भाइ कुन्दुनलाई अँगालो हालेर कामको प्रशंसा गरे । उनले निर्देशक शर्माले फिल्मलाई जसरी निर्माण गरे त्यसको सराहना गर्दै फिल्मको कथाले आफूलाई एकदमै छोएको बताए ।
यस्तै लुनिभा तुलाधरले सामान्य मान्छेको कथालाई सशक्त रुपमा पर्दामा उतारिएको बताइन् । कलाकार हेना नगरकोटीले फिल्म हेरेपछि त्यहाँ भएका पात्रका रुपमा आफूलाई पनि काम गर्न मन लागेको बताइन् । यसैगरी कलाकार इस्टु कार्कीले फिल्म एकदमै रिलेटेड लागेको बताइन् ।
निर्देशनसँगै यसपटक एउटा नाटकलाई नै ठूलो पर्दामा ल्याएको बताए । रंगमञ्चबाट भनिएको ‘साथी, साथी आइदेऊ न’ नाटकको कथालाई पुनः चलचित्रको माध्यममा ल्याउन विषयवस्तुले प्रभाव पारेको उनले बताए ।
किशोर मनोविज्ञानलाई खोतलेर उनीहरूको मानसिक स्वास्थ्यको कथा देखाइएको चलचित्र ‘ताराहरू’ मा आत्महत्याको मार्गमा हिँडेको एक युवक साथीहरुको साथबाट कसरी जीवन जिउनपर्छ भन्ने स्थितिमा फर्कन्छ भन्ने मूल विषय नै फिल्मको कथा हो ।
चलचित्रमा शर्मासँगै मेनुका प्रधान, कुन्दुन शाक्य, मीरा खड्का, प्रभाकर न्यौपाने, आभाष अधिकारी, राज पङ्गेनी शर्मा, प्रमोद बाबु, विकास खनाललगायतको अभिनय रहेको छ ।