विष्णु माझीले गीत रेकर्ड गर्दा सुन्दरमणि स्टुडियोमा पर्दा लगाउँछन्, बाहिर आफैँ बसेर भित्र कसैलाई छिर्न दिँदैनन्
काठमाडाैं । गायिका विष्णु माझी आफैँमा एक रहस्यमयी पात्र बनेकी छन् । उनले गीत रेकर्ड गर्दा पनि स्टुडियोको सिसामा पर्दा लगाइन्छ । गायकसमेत रहेका उनका श्रीमान् सुन्दरमणि अधिकारीले स्टुडियोको भित्र कसैलाई जान दिँदैनन् ।
माझी कतै नदेखिने, कसैसँग नबोल्ने, कार्यक्रममा कतै नजाने, नगाउने उनको स्वभावका कारण उनी झनझन् रहस्यमयी बन्दै गएकी छन् । उनी आफ्नै चाहनाले हो वा जबरस्ती परिबन्धमा परेर बाहिर निष्किदिनन्, आजसम्म कसैलाई थाहा छैन ।
‘लालु पाते नुँग्याे भुइँतिर’, ‘सुपारी चाम्रो’, ‘के भनौं र खोइ’, ‘सिमसिम पानी’लगाायत हरेक वर्ष आउने उनका तीज गीत लोकप्रिय छन् । उनका सयौँ गीतमा कति सोलो छन्, कति डोयट् छन् । डोयट पनि उनी आफ्नो पार्टमात्रै एक्लै स्टुडियोमा गाएर हिँड्छिन्, कसैसँग बोल्दिनन् । सँगै काम गरेका सहकर्मी र समकालीनहरूसँग पनि उनी बोल्दिनन् ।
सुरुसुरुमा दोहोरीमा काम गर्दा भने उनी साथीहरुसँग बोल्ने गरेको उनका सहकर्मीहरू बताउँछन् । विष्णु सुरुमा दोहोरी साँझमा गाउँथिन् । स्टुडियोमा अहिले उनी आउँदा छुट्टै कडाइ हुन्छ । फोटो लिक हुन्छ कि भन्नेमा सुन्दरमणि सजग हुन्छन् ।
“अहिले उहाँ आउँदा स्टुडियो र कन्ट्रोल रुमबीचमा रहेको पर्दा लगाएर पर्दा नभए पत्रिका टाँगेर गीत गाउनुहुन्छ । पर्दा लगाउने नभए पत्रिका टाँग्ने काम सुन्दरमणिले गर्छन्,” एकजना संगीतकार जसले विष्णुका थुप्रै गीतमा संगीत र एरेन्जमेन्ट गरेका छन्, उनले भने, “विष्णुको तस्बिर अहिलेसम्म गीति एल्बममा एउटा मात्रै देखिन्छ । यो पासपोर्ट साइजको तस्बिर । अरु तस्बिर किन आएनन् भने सुन्दरमणिजीले खिच्न दिनुहुन्न ।”
स्टुडियोमा आएका गायकगायिका तथा संगीतकाहरुले सेल्फी खिचौंभन्दा पनि सुन्दरमणिजीले होइन नखिचौं भन्ने गरेको ती संगीतकारले सुनाए ।
केही वर्ष अगाडि विष्णु किन मिडियासँग बोल्दिनन्, सार्वजनिक कार्यक्रममा सहभागी हुन्नन् । कतै परिवारले नै त बन्दक बनाएको छैन ? भन्ने आशंकको समाचार सार्वजनिक भएपछि जिल्ला प्रशासन कार्यालयले खोजी गरेकाे थियाे ।
साेही समयमा सुन्दरमणिसहित माझी जिल्ला प्रशासन कार्यालय पुगेको थियो । कालो लुगामा अनुहार ढाकेर पुगेकी विष्णुले भनेकी थिइन्, मलाई कसैले बन्दक बनाएको छैन । म मेरै खुसीले सार्वजनिक कार्यक्रम र स्थानमा नजाने गरेकी हुँ भन्ने जवाफ दिएकाे थिइन् ।
शब्द चयन
विष्णुलाई मन परेन भने शब्द छोड्ने गरेको एक स्टुडियो सञ्चालकले बताए । शब्द चित्त बुझेन भने शब्द मिलाउनु प¥यो भन्ने आग्रह पनि प्रोडुसरसँग विष्णु होइन सुन्दरमणि गर्छन् । विष्णुले प्राय धेरै गीत गाउने स्टुडियोमा मालश्री र मारुनी हुन् ।
जसका गीतबाट विष्णु माझी हिट् भइन्, उनै गीतकारले स्टुडियोमा उनलाई थुप्रैपटक भेटे । तर आजसम्म स्टुडियोमा भेट हुँदा सञ्चै हुनुहुन्छ ? भन्ने र गीत रेकर्ड गरिसकेपछि गीत कस्तो भयो ? भन्ने औपचारिकताबाहेक केही कुरा नभएको ती गीतकार बताउँछन् । ती गीतकारले भन्छन्, “विष्णु माझी आउँदा स्टुडियोमा क्यामेरा अन नगर्ने नियम जस्तै बनिसकको छ ।”
कसैले विष्णुलाई गीत गाउन मन लाग्यो भने कि स्टुडियो कि सुन्दरमणिलाई भन्नुपर्छ । पारिश्रमिकमा कुरा मिल्यो भने स्टुडियो र सुन्दरमणिले रेकर्डिङको समय मिलाउँछन् । पारिश्रमिक पनि स्टुडियोमार्फत नै दिन्छन् । स्टुडियोमा आउँदा श्रीमान् सुन्दरमणिले गाडीमा लिएर आउँछन् ।
सरासर स्टुडियोभित्र लैजान्छन् र, गीत रेकर्ड नगर्दासम्म सुन्दरमणि बाहिर बस्छन् । त्यो समय स्टुडियोमा कसैलाई पनि समय नदिनु भनेर पहिला नै भनिसकेका हुन्छन् । कसैलाई आउन दिँदैनन् । रेकर्डिङ सकेपछि सरासर सवारी साधनमा पु¥याएर घर लैजान्छन् । विष्णु भने स्टुडियोमा रहेको उनले गाउने गीतको डमी भ्वाइस लगातार एक घण्टा हेडफोनमा सुन्छिन् । अर्को एक घण्टा गाउन प्राक्टिस गर्छिन् र, अर्को एक घण्टा रेकर्ड गर्छिन् । तीन घण्टामा रेकर्डिङ सकेर निस्किन्छन् । त्यो तीन घण्टासम्म सुन्दरमणि स्टुडियो छोडेर कतै पनि जाँदैनन् ।
स्याङ्जा चापाकोट खरियाघाटकी विष्णु माझी सुन्दरमणिसँग काठमाडौंमा बस्दै आएकी छिन् । उनलाई बुटवल महोत्सवबाट सुन्दरमणिले काठमाडौं ल्याएर गायिका बनाएका थिए । विष्णु माझीको विवाह गायक तथा संगीतकार सुन्दरमणि अधिकारीसँग २०६८ साल मंसिर २९ गते पोखराको राम मन्दिरमा भएको थियो । विष्णु माझी दुई जुम्ल्याहा सन्तानकी आमा हुन् । स्याङजा छापाकोटमा २०४३ सालमा जन्मिएकी उनी १७ वर्षको उमेरदेखि गीत गाउँदै आएकी छिन् ।
भिडियो रिपोर्ट: