चलचित्र ‘काजी’को शुभमुहूर्तसँगै छायांकनको लागि स्याङ्जामा टिम
काठमाडाैं । चलचित्र ‘काजी’को शुभमुहूर्त गरिएको छ । आज दक्षिणकाली मन्दिरमा क्यामेरा तथा स्कृप्ट पूजा गर्दै शुभमुहूर्त गरिएको । लक्ष्मण रिजालको निर्देशनमा निर्माण हुन लागेकाे सिनेमाकाे निर्माण टिम शुभमुहूर्तसँग छायांकनको लागि स्याङ्जा निस्केको छ ।
करिब ८ वर्षपछि निर्देशनमा फर्केका हुन् । आफुले खोजेको जस्तै स्कृप्ट पाएकाले निर्देशनमा कमव्याक गर्न तयार भएको निर्देशक रिजाल बताउँछन् । उनले यसअघि ‘कसम’, ‘धुँवा यो नसा’, ‘अलविदा’, ‘कायरा’ लगायतका सिनेमा निर्देशन तथा ‘डिसेम्बर फल्स’ र ‘गणपति’को निर्माण गरेका थिए ।
सिनेमामा विपिन कार्की, केकी अधिकारी, गरिमा शर्मा लगायतका कलाकारको अभिनय रहनेछ । अन्य कलाकार को-को रहेका छन् भन्ने विस्तारै सार्वजनिक गर्दै जाने जानकारी निर्माण टिमले दिएको छ ।
प्रदीप भारद्धाजको लेखन रहेको सिनेमालाई चिन्तनराज भण्डारीले खिच्दै छन् । सिनेमाका लागि गीतसंगीत कालिप्रसाद बास्कोटाले तयार पारेका हुन् । यो सिनेमालाई सुनिल मानन्धरको श्रीराम बालाजी फिल्मस्ले वितरण गर्नेछ ।