‘बेहुली फ्रम मेघौली’का निर्देशककाे नयाँ फिल्म ‘जिरो डिग्री’, विजय बराल मुख्य भूमिकामा

काठमाडौं । ‘बेहुली फ्रम मेघौली’ निर्देशन गरेका सजन काफ्ले र आकास बरालले आफ्नो नयाँ फिल्म ‘जिरो डिग्री’ निर्माण गर्ने घोषणा गरेका छन् ।

मेघौली फिल्म्सको ब्यानरमा निर्माण हुने यो फिल्मको सोमबार एक मिनिमल पोस्टर सार्वजनिक गर्दै औपचारिक घोषणा गरिएको हो ।

चलचित्रको कथा राजन भुसालले लेखेका हुन् भने पटकथा र संवाद निर्देशकद्वय स्वयंले तयार पारेका छन् ।

निर्देशकका अनुसार, यो मात्र एक सामाजिक प्रसङ्ग नभई हल्का हास्यरस (लाइट कमेडी) मिसिएको जीवन्त कथा हो ।

कथावस्तु सडक सुविधा नभएको गाउँमा केन्द्रित छ, जहाँ आमाबुबाको निधन भएपछि विदेशमा रहेका छोराछोरी पुगुन्जेलसम्म शव सुरक्षित राख्न गाउँलेहरूले डीप फ्रिज बोकेर गाउँसम्म ल्याउने घटनाक्रम वरिपरि घुम्छ ।

फिल्ममा मुख्य भूमिकामा अभिनेता विजय बराल देखिने भएका छन् । पोस्टर डिजाइन ट्राइडेन्ट कन्सेप्टका रोयल भीमसेनले तयार पारेका हुन् ।

सार्वजनिक पाेस्टरमा कलाकारको अनुहारभन्दा फरक ढंगले डीप फ्रिज बोकेर खोला तारिरहेका मानिसहरूलाई केन्द्रमा राखिएको छ, जसले कथाको विशेष पक्षलाई सीधै दर्शक सामु पस्केको छ ।

फिल्मका कार्यकारी निर्माता मोती कार्की हुन् भने यसको वितरण कुबेर सिने डिस्ट्रिब्युसनले गर्नेछ । छायाङ्कन तिहारपछि सुरु हुने र आगामी वर्ष २०८३ लाई प्रदर्शन गर्ने लक्ष्य लिइएको छ।

संगीततर्फ अङ्कित बाबु अधिकारीले गीतमा संगीत दिनेछन् भने चर्चित गीत ‘ऊनको स्वीटर’का गीतकार युवराज काफ्लेले यस फिल्मका गीत लेख्ने जिम्मेवारी पाएका छन् ।