चलचित्र ‘सिन्दूर’ जो एक वर्ष हलमा चलेर बनाएको थियो यस्ता रेकडैरेकर्ड
काठमाडौं । नेपाली चलचित्र उद्योगमा चलचित्र ‘सिन्दूर’ पनि एक ऐतिहासिक चलचित्र हो । यसका नाममा थुप्रै रेकर्ड छन् ।
ऐतिहासिक सफलताको रकेर्ड पनि यही चलचित्रका नाममा छ । ‘सिन्दूर’ लगातार ५२ साता चल्ने पहिलो चलचित्र हो । ५२ साता भनेको एक वर्ष हो ।
यो चलचित्र काठमाडौं उपत्यकाका विभिन्न हलहरूमा संयुक्त रूपमा ५२ सातासम्म चलेको थियो । यो चलचित्र अशोक हल पाटन, नवदुर्गा भक्तपुर, जय नेपाल काठमाडौं, विश्वज्योति काठमाडौं र रञ्जनमा चलेको थियो ।
‘सिन्दूर’ विसं. २०३६ मंसिर १० गते सार्वजनिक प्रदर्शनमा आएको थियो । यो चलचित्रलाई प्रकाश थापाले निर्देशन गरेका थिए । ५२ सातासम्म चले पनि यो चलचित्रको निर्माण टिमले कुनै पनि सेलिब्रेसन गरेको थिएन । जबकी अहिले चलचित्र रिलिजको ५१ दिन जबरजस्ती टिकाएर सेलिब्रेसन गर्ने फेसन नै चलेको छ ।
‘सिन्दूर’कै नाममा रहेको अर्को रेकर्ड हो, डविङ । यो नेपालमै डविङ भएको पहिलो चलचित्र हो । सुरुसुरुमा नेपाली चलचित्रको डविङ भारतमा गरिन्थ्यो । डविङ मात्रै होइन मिक्सिङ र प्रिन्टिङको काम पनि भारतमै हुन्थ्यो ।
तर, ‘सिन्दूर’ नेपालमै डविङ भएको पहिलो नेपाली चलचित्र हो ।
यो चलचित्रमा गोपालराज मैनाली र बसुन्धरा भुसाल चंखे र नक्कली नाममा अभिनय गरेर चर्चित चलचित्र जोडी बनेको थियो । नीर शाह पहिलो पटक खलनायकको भूमिकामा देखिएका थिए । हिरोमा विश्व बस्नेत थिए । उनको यो दोस्रो चलचित्र थियो ।
यो चलचित्र ४६ वर्षपछि ०८१ सालमा अन्तर्राष्ट्रिय नारी दिवसको सन्दर्भ पारेर चलचित्र विकास बोर्डको हलमा स्क्रिनिङ गरिएको थियो ।
‘सिन्दूर’ दोस्रो रंगिन सिनेमा हो । यो चलचित्र उज्बेकिस्तानको फिल्म फेस्टिभलबाट छनोट भएको थियो ।
यही चलचित्रबाट उदितनारायण झाले पार्श्व गायनमा डेब्यु गरेका थिए । जो पछि बलिउडमा एत्र राज गर्न सफल भए । यसमा उनले ‘हे नक्कली’ बोलको गीत गाएका थिए ।
नृत्य निर्देशक वसन्त श्रेष्ठले पनि यही सिनेमाबाट नृत्य निर्देशन सुरु गरेका थिए । यो चलचित्र चीनमा सबटाइटल गरेर पनि देखाइएको थियो ।