‘जेरी अन टप’को टिजरमा त्रिकोणात्मक प्रेम कथा
काठमाडौं । नेपाली रोमान्टिक ड्रामा ‘जेरी अन टप’ टिजर सार्वजनिक भएको छ । टिजरमा त्रिकोणात्मक प्रेम कथा छ ।
हिमालका सुकिला दृश्यमा चलचित्रमा खुलेको त्रिकोणात्मक प्रेम कथा टिजरमा देख्न सकिन्छ । प्रेम, रोमान्स, धोका र ट्रयाजिडी टिजरमा देखाइएको छ ।
पछिल्लो समयको युवा पुस्ताको प्रेमप्रतिको बुझाई र त्यसको मनोविज्ञानले सिर्जना गर्ने समस्या टिजरमा निर्देशकले देखाएका छन् । रमाइलो र मस्तीबीचको एडभेन्चर लाइफ टिजरमा छ ।
हिमाल परबाट देख्दा जति सुन्दर छ, त्यहाँको यात्रा र जीवन त्यति नै असजिलो र रिस्की छ भन्ने टिजरमा एकसाथ देखाइएको छ ।
अनमोल केसी, आँचल शर्मा र जसिता गुरुङले त्रिकोणात्मक प्रेम कथा छ । त्यसमै रोमान्स र धोका छ । धोका दिएको परिणाम पनि छ ।
झल्याकझुलुक देखिने केदार घिमिरेको फरक गेटअपले कौतुहलता सिर्जना गरेको छ । छोरो अनमोल केसीसँगै बुवा भुवन केसीको अभिनयले टिजर विशेष देखिएको छ । हिमालको सुन्दरताले टिजरलाई सुन्दर देखाएको छ ।
अनन्या फिल्मस् प्रालिको चलचित्र ‘जेरी अन टप’ असोज ३१ गतेबाट प्रदर्शनमा आउँदैछ ।
सुयोग गुरुङको निर्देशनमा बनेको चलचित्रमा अनमोल, आँचल र जसितासँगै केदार घिमिरे ‘माग्नेबुढा’, भुवन केसी, सुरक्षा पन्त र उषा खड्कीको पनि महत्वपूर्ण भूमिका रहनेछ । अनमोलको बुवाको भूमिकामा आफ्नै पिता भुवन केसी देखिँदै छन् ।
यो चलचित्र सगरमाथा बेसक्याम्प, काठमाडौं र मुस्ताङमा छायांकन गरिएको छ ।
सिनेमाको कथा हेमराज बिसीको रहेको छ भने पटकथा विश्वास तिम्सिनाले लेखेका हुन् । दुलिप रेग्मीको छायांकनमा बनेको फिल्ममा कालिप्रसाद बास्कोटा, जयन जे वाइबा, जोहन चाम्लिङ राई र ब्रिजेश श्रेष्ठको संगीत रहेको छ ।
सरोज न्यौपानेको प्रस्तुतिमा रोविन शेरचन, रामकृष्ण श्रेष्ठ र दीपक भण्डारी निर्माता रहेको सिनेमाको कार्यकारी निर्मातामा अनुराधा गिरी र इश्वर श्रेष्ठ रहँदा एसोसिएट निर्मातामा नविन घिमिरे, विवेक थापा र भविष्य खड्का छन् ।