विधवा महिलाको कथामा चलचित्र ‘कन्यादान’ बन्ने
काठमाडौं । निर्देशक अर्जुन सुवेदीको निर्देशनमा नयाँ चलचित्र ‘कन्यादान’ निर्माण हुने भएको छ ।
मंगलवार हरितालिका तिजको अवसर पारेर घोषणासँगै सार्वजनिक गरिएको थिम पोस्टरमा महिलाको साङ्केतिक चित्रले विधवाले भोग्ने मौन पीडा र पुनः जीवनप्रतिको चाहनालाई प्रतिबिम्बित गरेको छ ।
सामाजिक संवेदनशील विषयलाई केन्द्रमा राखेर बन्ने यस चलचित्रले विधवा महिलाको जीवन र उनीहरूले समाजबाट पाउने चुनौतीलाई पर्दामा उतार्ने तयारी गरेको छ ।
निर्देशक सुवेदीका अनुसार चलचित्रको मूल सन्देश “हरेक विधवाले दोस्रो अवसर पाउनुपर्छ” भन्ने रहनेछ । समाजका कठोर परम्परा र मान्यतालाई चुनौती दिँदै विधवाले पुनः प्रेम, जीवन र अधिकार पाउने प्रसङ्गलाई यसमा प्रस्तुत गरिनेछ ।
निर्देशक सुवेदी र कुमार भट्टराईको संयुक्त लेखन रहेको चलचित्रलाई आगामी वर्ष रिलिज गर्ने लक्ष्य लिइएको छ । निर्माणमा प्लानेट थ्री फिल्म्स मुख्य जिम्मेवारीमा रहनेछ भने सुभकाशा पिक्चर्स र ट्राइडेन्ट कन्सेप्ट सहकार्य रहने छ ।
चलचित्रमा रेजिना बिस्ट प्रस्तुतकर्ता, मार्टिन ओली कार्यकारी निर्माता, सुसन प्रजापति छायाङ्कन निर्देशक, प्रशान्त सिवाकोटी संगीतकार, सुजन खतिवडा प्रोजेक्ट हेड, रोयल भीमसेन पोस्टर तथा पब्लिसिटी डिजाइनर रहेका छन् ।
यसअघि ‘कन्यादान’ शीर्षकमा दुईपटक सिनेमा बनिसकेका छन् । ‘कन्यादान’ शीर्षकमा पहिलै चलचित्र बनेका भए पनि सुवेदीको यो प्रस्तुति भने नयाँ कथामा आधारित हुने जनाइएको छ ।
निर्देशक सुवेदीको अर्को चलचित्र ‘सोल्टिनी’ रिलिजको तयारीमा रहेको छ ।