‘रिमै’ को कथा : कबड्डीभन्दा कति फरक ?
काठमाडौं । अभिनेता दयाहाङ राई र अभिनेत्री रिश्मा गुरुङले आफ्नो नयाँ चलचित्र ‘रिमै’ कबड्डी सिरिजभन्दा फरक कथावस्तु र सांस्कृतिक परिवेशमा बनेको बताएका छन् ।
चलचित्रको बारेमा गरिएको कुराकानीमा उनीहरुले ‘रिमै’ले गुरुङ समुदायको मौलिक कथा प्रस्तुत गर्ने जानकारी दिए । कलाकार दयाहाङ राईका अनुसार, सम्बन्धका कथाहरू बाहिरबाट हेर्दा उस्तै लागे पनि सांस्कृतिक हिसाबले ‘रिमै’ र ‘कबड्डी’मा भिन्नता छ । कबड्डीमा थकाली परिवेश छ भने ‘रिमै’ गुरुङ समुदायको कथामा आधारित छ ।
उनले गुरुङ संस्कृतिमा फुपूचेला र मामाचेलाको पुरानो सम्बन्धको चलनलाई चलचित्रले देखाउन खोजेको बताए । ‘रिमै’को अर्थ गुरुङ समुदायमा छोरीचेली हुने र चलचित्रले एउटा परिवारमा रिमैको महत्व र भूमिकालाई देखाउन खोजेको राईले स्पष्ट पारे । यो चलचित्र फुपूचेला-मामाचेलाको सम्बन्धभित्रको पारिवारिक कथा हो ।
अभिनेत्री रिश्मा गुरुङले आफू गुरुङ समुदायकै भएकोले चलचित्रको कथासँग अझ नजिक महसुस गरेको बताइन् । उनले आफ्नो बुबा र बाजेले सिकाएको संस्कार र संस्कृतिलाई चलचित्रमा उतार्न पाएकोमा खुशी व्यक्त गरिन् । गुरुङ जातिको रीति संस्कृति निकै धनी रहेको र कबड्डीमा देखाइएको भन्दा यो फरक रहेको उनको भनाइ थियो ।
चलचित्र निर्माणका क्रममा केही आर्थिक समस्या आएको र त्यसलाई समाधान गर्न आफूहरुले पहल गरेको पनि कलाकारहरुले स्वीकारे । दयाहाङ राईले प्राविधिक र आर्थिक पाटोमा केही अप्ठ्यारा आए पनि त्यसलाई समाधान गर्न आफू अगाडि सरेको बताए ।
रिश्मा गुरुङले पनि कलाकारहरुको पारिश्रमिकबाट उठाएर पनि कामलाई निरन्तरता दिएको स्मरण गरिन् । ‘रिमै’ नेपाली समाज र सिनेमाको लागि एउटा नयाँ आयाम बन्न सक्ने र गुरुङ समुदायको जीवन दर्शन र विश्वास पद्धतिलाई उजागर गर्ने एक महत्वपूर्ण दस्तावेज हुनेमा कलाकारहरु विश्वस्त छन् । उनीहरुले ‘कबड्डी’को स्वाद खोज्ने दर्शकलाई पनि निराश नबनाउने तर एउटा फरक कथा हेर्न पाउनेमा जोड दिए ।