‘कोशेढुंगा’मा सुरक्षा नै किन ?
काठमाडौं । भदौ १२ गते चलचित्र ‘कोशेढुंगा’ प्रदर्शनमा आउँदा अर्को एउटा नयाँ महिलाप्रधान सिनेमाको संख्या थपिनेछ । नेपालमा कमै मात्रै महिलाप्रधान सिनेमा बन्छन् ।
‘कोशेढुंगा’ले महिलालाई प्रधान पात्र बनाएर कथा भन्दैछ । र, यो अवसर पाएकी छन्, अभिनेत्री सुरक्षा पन्तले । ‘कोशेढुंगा’को कथा भन्न किन निर्देश्क सरोज पौडेलले सुरक्षालाई नै रोजे ?
सुरक्षाले यसअघि पनि महिलाप्रधान कथा भएका चलचित्रमा अभिनय गरिसकेकी छन् । सिंगो सिनेमा आफ्नो काँधमा बोकिसकेकी छन् ।
“सुरक्षाजी आफैँ सक्षम र अब्बल कलाकार हो । उहाँलाई समग्र सिनेमाको लिड रोल गरेको अनुभव पनि छ,” निर्देशक सरोज भन्छन्, “उहाँले आमा, बहाव, खेलजस्ता सिनेमामा प्रधान क्यारेक्टर गरिसक्नु भएको छ । अर्को कुरा उहाँ साँच्चै राम्रो कलाकार पनि हो ।”
विषयवस्तुको बुझाईलाई लिएर पनि सुरक्षालाई छनोट गरिएको उनी सुनाउँछन् ।
“हामीलाई हाम्रो सिनेमाको कथा बुझ्ने र त्यसलाई महसुस गर्ने क्यारेक्टर पनि चाहिएको थियो,” उनी भन्छन्, “जुन, उहाँमा थियो । विषयवस्तुको गहिराई र संवेदनशिलतालाई महसुस गर्नसक्ने क्षमता पनि उहाँमा थियो । अर्को कुरा उमेर पनि हो । उमेर पनि हाम्रो सिनेमाको क्यारेक्टर र उहाँको उमेरमा धेरै फरक नरहेकाले उहाँ हाम्रो छनोटमा पर्नुभयो ।”
सरोज पौडेलको निर्देशन रहेको चलचित्र ‘कोशेढुंगा’ भदौ १२ गते रिलिज हुँदै छ । जुन यो वर्षको प्रतिक्षित सिनेमा पनि हो । निर्देशकको ट्रयाक रेकर्डका कारण यो सिनेमाप्रति दर्शकको उत्सुकता छ । किनकी सरोजले नेपालकै सबैभन्दा धेरै कमाउने चलचित्र ‘पूर्ण बहादुरको सारङ्गी’ निर्देशन गरेका थिए ।
निर्देशक पौडेलको निर्देशन रहेको यो चलचित्र ‘कोशेढुंगा’को छायांकन स्याङ्जाको आधिखोला, त्रिवेणी र सिरुवारी क्षेत्रमा गरिएको छ । काठमाडौंमा पनि सेट लगाएर यो सिनेमाको छायांकन गरिएको छ ।
नरदेवी फिल्मसको प्रस्तुति रहेको चलचित्र ‘कोशेढुंगा’मा अभिनेत्री सुरक्षा पन्तसँगै प्रेविल कँडेल, आर्यन सिक्देल, ऋचा शर्मा, नीति शाह, प्रवीण खतिवडा, सरोज खनाल, विशाल पहाडी, लोकमणि सापकोटा, हिउवाला गौतम, सिर्जना अधिकारी, शेखर चापागाई, दिनेश काफ्ले, सिरु विष्ट, स्नेहा जोशी, सुबलमणि सापकोटा, सविता रेग्मीलगायतको अभिनय रहेको छ ।
चलचित्रको निर्मातामा प्रेविल कँडेल र किशोर अनुराग छन् । कार्यकारी निर्माता दिनेश खड्का हुन् । बाबु श्रेष्ठले छायांकन गरिरहेको यो चलचित्रलाई सुरेन्द्र पौडेलले सम्पादन गरिरहेका छन् ।
यस चलचित्रको गीतमा रिदम कँडेल र आशिष अविरलको संगीत रहने छ । कास्टिङ डिरेक्टर सुवलमणि सापकोटा हुन् ।