आजबाट चलचित्र ‘कोशेढुंगा’ प्रदर्शन
काठमाडौं । चलचित्र ‘कोशेढुंगा’ आजबाट प्रदर्शनमा आएको छ । चलचित्र देशभर आज एकसाथ रिलिज भएको हो ।
बुधबार गरिएको प्रिमियरमा तारिफ बटुलेको चलचित्र सन्तोषजनक शो सहित आजबाट प्रदर्शनमा आएको हो । वैदेशिक रोजगारीमा गएको व्यक्ति कसरी बिनाअपराध अपराधी करार हुन्छ । र, त्यसको असर उसको परिवारमा कस्तो पर्छ भन्ने सिनेमाले देखाएको छ ।
ब्लड मनीको कथा उठान गरेको चलचित्रले प्रिमियरमा हरेक नेपालीको घरघरको कथा लिएर ‘कोशेढुंगा’ आएको भन्दै तारिफ पाएको छ ।
प्रिमियरमा तारिफ पाएको, आम नेपालीको कथा उठान गरेको र ‘नत्र भने जिन्दगी व्यर्थ छ’ बोलको गीत हिट भएकाले चलचित्र पनि दर्शकले मन पराउनेमा निर्देशक सरोज पौडेल ढुक्क छन् ।
नरदेवी फिल्मसको प्रस्तुति रहेको चलचित्र ‘कोशेढुंगा’मा अभिनेत्री सुरक्षा पन्त, मन्जिल कुमार, आर्यन सिक्देल, ऋचा शर्मा, नीति शाह, प्रवीण खतिवडा, सरोज खनाल, विशाल पहाडी, लोकमणि सापकोटा, हिउवाला गौतम, सिर्जना अधिकारी, शेखर चापागाई, दिनेश काफ्ले, सिरु विष्ट, स्नेहा जोशी, सुबलमणि सापकोटा, सविता रेग्मीलगायतको अभिनय रहेको छ ।
चलचित्रको निर्मातामा प्रेविल कँडेल र किशोर अनुराग छन् । कार्यकारी निर्माता दिनेश खड्का हुन् । बाबु श्रेष्ठले छायांकन गरेको यो चलचित्रलाई सुरेन्द्र पौडेलले सम्पादन गरेका छन् ।
यस चलचित्रको गीतमा रिदम कँडेल र आशिष अविरलको संगीत छ ।