बलिउड अभिनेता धर्मेन्द्रको ८९ वर्षको उमेरमा निधन
काठमाडौं । भारतीय चलचित्रका दिग्गज अभिनेता धर्मेन्द्रको निधन भएको छ । सोमबार अपराह्न उनको आफ्नै निवासमा ८९ वर्षको उमेरमा निधन भएको हो ।
अभिनेता धर्मेन्द्र केही समयदेखि उमेरसँग सम्बन्धित रोगबाट पीडित थिए । नोभेम्बर १० मा उनलाई श्वासप्रश्वासमा समस्या भएको थियो र मुम्बईको ब्रीच क्यान्डी अस्पतालमा भर्ना गरिएको थियो ।
निको भएपछि धर्मेन्द्रलाई डिस्चार्ज गरिएको थियो । तर आज उनको निधन भएको भारतीय सञ्चारमाध्यमहरूले जनाएका छन् ।
बलिउड फिल्म निर्माता करण जोहरले अभिनेता धर्मेन्द्रको निधन भएको पुष्टि गर्दै सामाजिक सञ्जालमार्फत श्रद्धाञ्जलि व्यक्ति गरेका छन् ।
धर्मेन्द्रको मृत्युको बारेमा फिल्म निर्देशक करण जोहरले इन्स्टाग्राममा पोस्ट गर्दै भनेका छन्, ”यो एक युगको अन्त्य हो…एक विशाल मेगास्टार.. मेनस्ट्रीम सिनेमामा एक नायक.. अविश्वसनीय रूपमा सुन्दर र स्क्रिनमा सबैभन्दा रहस्यमय उपस्थिति जनाउने, सिनेमाको इतिहासमा एक विशेष र गौरवशाली उपस्थिति उनी भारतीय सिनेमाको एक साँचो किंवदन्ती हुन् र सधैँ रहनेछन्..”
हेमा मालिनी र उनकी छोरी इशा देओल घाटमा पुगेका भारतीय सञ्चारमाध्यमले जनाएका छन् । त्यस्तै, अभिनेता अमिताभ बच्चन र अभिषेक बच्चन मुम्बईको विले पार्ले श्मशानघाटमा पुगेका छन् ।
धर्मेन्द्र हिन्दी सिनेमाका सबैभन्दा सम्मानित र लोकप्रिय स्टारहरू मध्ये एक थिए । सन् १९६० बाट अभिनय यात्रा सुरु गरेका उनले ३०० भन्दा बढी चलचित्रमा काम गरेका छन् ।
सात दशकभन्दा बढीको करियरमा धर्मेन्द्रले ‘शोले,’ ‘चुपके चुपके,’ ‘सीता और गीता,’ र ‘धरम वीर’ जस्ता सुपरहिटहरूसहित ३०० भन्दा बढी फिल्महरूमा अभिनय गरे ।
उनका संवादहरू अझै पनि जनमानसमा सम्झनामा छन् ।
