युट्युबमा सबैभन्दा धेरै हेरिएको कुन चलचित्रको ट्रेलर हो ?
काठमाडौं । चलचित्र ‘पूर्ण बहादुरको सारङ्गी’का नाममा थुप्रै रेकर्ड छन् । गत वर्षको तिहारमा रिलिज भएको यो चलचित्रसँग थुप्रै रेकर्ड छन् ।
थुप्रै रेकर्डमध्ये एउटा हो, ट्रेलरका नाममा रहेको रेकर्ड । युट्युबमा सबैभन्दा धेरै हेरिने ट्रेलरको रेकर्ड ‘पूर्ण बहादुरको सारङ्गी’का नाममा छ ।
एक वर्षमा यो ट्रेलरले युट्युबमा ७.५ मिलियन अथवा ७५ लाख भ्युज पाएको छ । यो अहिलेसम्म ट्रेलरले पाएको सबैभन्दा धेरै भ्युज हो ।
‘पूर्ण बहादुरको सारङ्गी’का नाममा सबैभन्दा धेरै कमाउने, सबैभन्दा धेरै शो पाउने, एकै दिन सबैभन्दा धेरै कमाउने चलचित्रको रकेर्ड पनि यसकै नाममा छ ।
चलचित्र ‘प्रेम गीत ३’को हिन्दी भर्सन दोस्रो स्थानमा छ । यसको ट्रेलरले ६.२ मिलियन अथवा ६२ लाख भ्युज पाएको छ । तर, यसको नेपाली भर्सनको ट्रेलरको भ्युज भने निकै कम छ । २२ लाखले मात्रै हेरेका छन् ।
‘पूर्ण बहादुरको सारङ्गी’ले नेपालमा मात्रै ४६ करोड ८० लाख रुपैयाँ ग्रसकलेक्सन गरेको थियो । नेपाल बाहिर समेत गरेर ७५ करोडभन्दा माथि कलेक्सन गरेको थियो ।
गत वर्षको लक्ष्मिपूजाका दिन रिलिज भएको यो चलचित्रले सर्वाधिक धेरै शो पाउने चलचित्रको पनि रेकर्ड बनाएको छ । एकै दिन यो चलचित्रले ९८ हलमा ४६५ भन्दा धेरै शो पाएको थियो ।
सरोज पौडेलले निर्देशन गरेको चलचित्रमा विजय बराल, प्रकाश सपूत, मुकुन भुसाल, अञ्जना बराइलीलगायत कलाकारको मुख्य भूमिका थियो ।
चलचित्रमा संवाद महेश दवाडीले लेखेका थिए । सेभेन सिस सिनेमाको प्रस्तुति रहेको सिनेमाका निर्माता विनोद पौडेल थिए । कार्यकारी निर्मातामा रमेश चौलागाईं र हरि श्रेष्ठ रहेका थिए ।
‘पूर्ण बहादुरको सारङ्गी’ले गन्धर्व समुदायको कथा उठाएको थियो । छोराको प्रगतिका लागि बाबुले गर्ने संघर्ष यो सिनेमाको मुख्य कथा थियो ।
