‘झिँगेदाउ २’ मंसिर १५ गतेबाट छायांकनमा, महेश र आर्यन अनुबन्ध, मुकुन आउट !
काठमाडौं । ज्ञानेन्द्र देउजाको निर्देशनमा निर्माण हुने चलचित्र ‘झिँगेदाउ २’ छायांकनको अन्तिम तयारीमा छ । निर्मातासमेत रहेका निर्देशक देउजाले सिनेमा आगामी मंसिर १५ गते शुभमुहूर्त गर्दै छायांकन सुरु गर्ने भएका हुन् ।
चलचित्रमा मुख्य कलाकार हेरफेर गरिएको छ । निर्देशक तथा निर्माता ज्ञानेन्द्र देउजाले सिनेमाको मुख्य अभिनेता मुकुन भुषालको ठाउँमा अर्का अभिनेता महेश त्रिपाठीलाई अनुबन्धित गरेका छन् । निर्देशक र कलाकारबीच छायांकन सेड्युलाई लिएर विवाद हुँदा सिनेमाबाट मुकुनको विकल्प खोज्नु परेको निर्देशक देउजा बताउँछन् ।
निर्देशक देउजाले लामो समयदेखि कलाकारको सेड्युलका कारण भनेको समयमा छायांकनमा निस्कन सकेका थिएन् । सोही विषयमा विवाद भएपछि उनले ‘झिँगेदाउ २’ बाट मुकुनलाई निकालेर महेशलाई अनुबन्धित गर्दै छायांकनमा जान तयार भएका हुन् ।
अभिनेता भुषालको करियरको पहिलो सुपरहिट सिनेमा नै ‘झिँगेदाउ’ थियो । त्यसअघि उनले केही राम्रा सिनेमामा अभिनय गरेपनि बक्सअफिसमा सफल हुनसकेका थिएनन् ।
कपनगढी सिनेमा प्रालीको व्यानरमा निर्माण हुने यो चलचित्रमा महेशसहित आर्यन सिग्देल, सरोज खनाल, बसुन्धरा भुषाल, चैत्यदेवी सिंहलगायत कलाकारलाई भित्र्याएका छन् । यसअघिका कलाकारहरुमा केकी अधिकारी, आँचल शर्मा, कुशल विष्ट, अंशु महर्जन, विजय देउजा, संगम भण्डारी, हिउँवाला गौतम, आयन खड्का लगायतका कलाकार भने यतावत् छन् ।
सिनेमाका निर्माता शुलभ प्रतिक देउजा र समीक्षा देउजा हुन् । ईश्वर घिमिरे प्रोडक्सन हेड रहेको सिनेमामा बिष्णु कल्पितको छायांकन, अर्जुन पोखरेलको संगीत, रोशन श्रेष्ठको द्धन्द्व निर्देशन र मित्र डि गुरुङको सम्पादन रहनेछ ।
