‘परान’को मुख्य भूमिकामा सुरुमा अरुलाई नै गरिएको थियो अफर
काठमाडौं । चलचित्र ‘परान’ यतिबेला अरु चलचित्रलाई पछि पार्दै अगाडि बढिरहेको छ । आफूभन्दा अगाडि रिलिज भएका र पछाडि रिलिज भएका र विदेशी चलचित्रलाई पनि पछि पारेर अगाडि बढिरहेको छ ।
हरेक दिन शो थपिँदैछ भने पाएका शो हाउसफूल हुँदै गएका छन् । यो ट्रेन्ड हेर्दा यो चलचित्रले अझै लामो समय दर्शकको साथ पाउने निश्चित छ ।
‘परान’ कात्तिक १४ गते रिलिज भएको थियो । यसले यो भन्दा पछि आएको ‘जारी २’को मात्रै दर्शक खोसेन, ‘जेरी अन टप’का दर्शक पनि खोस्यो ।
दर्शकको वर्ड अफ माउथ र समीक्षकको समीक्षा दुवैको साथ पाउँदा सुरुका केही दिन कमजोर देखिएको ‘परान’ले अहिले आक्रामक व्यापार गरिरहेको छ ।
कात्तिक १४ गते रिलिज भएको चलचित्र ‘परान’लाई दीपक प्रसाद आचार्यको निर्देशन गरेका छन् । सिनेमाको कथा पनि उनी आफैँले लेखेका छन् ।
यो चलचित्रको मुख्य भूमिकामा नीर शाह र महेश त्रिपाठी छन् । पूजा चन्द, मदनकृष्ठ श्रेष्ठ, केकी अधिकारी, अञ्जना बराइली, प्रविण खतिवडा, बुद्धि तामाङलगायतका कलाकारको पनि अभिनय छ ।
अहिले नीर शाह र महेश त्रिपाठीको अभिनयको चर्चा छ । उनीहरूले यो सिनेमालाई जुरुक्कै उठाएको चर्चा भइरहेको छ ।
यो सिनेमामा सुरुमा नीर शाहको ठाउँमा हरिवंश आचार्य र महेशको ठाउँमा प्रदीप खड्कालाई अफर गरेको बुझिएको छ । तर, उनीहरूले समयको व्यस्थता वा अन्य प्राविधिक के कारणले हो यो सिनेमा नगरेपछि नीर शाह र महेश अनुबन्धित भएको बुझिएको छ ।
त्यसो यसका निर्देशक दीपक आचार्य नयाँ निर्देशक पनि हुन् । उनको यो डेब्यु निर्देशन पनि हो । उनी लाइट कमेडी सिरयलबाट सिनेमामा जम्प गरेका हुन् । उनले पहिलो प्रयासमै आफूलाई सफल निर्देशकको कित्तामा उभ्याएका छन् ।
अब भने उनले कास्टिङमा सम्भवत दोस्रो सिनेमाबाट समस्या झेल्नु पर्नेछैन । तर, कलाकारले विश्वास गर्ने बलियो कथालाई हो । एउटा सिनेमा सफल भयो भन्दैमा उसका सबै सफल सिनेमा सफल हुन्छन् र स्क्रिप्ट उत्तिकै बलियो हुन्छ भन्ने हुँदैन । तर, हरेक निर्देशकका प्रत्येक सिनेमा उत्तिकै सफल हुन्, हाम्रो कामना !
