गायक प्रकाश दुतराजलाई स्टेजमै युवतीको ‘सरप्राइज’ अंगालो, भिडियो भाइरल
काठमाडौं । लोकप्रिय लोकगायक प्रकाश दुतराजको लाइभ स्टेज प्रदर्शनबाट एक रोचक दृश्य सामाजिक सञ्जालमा अहिले भाइरल भइरहेको छ ।
बुटवलमा आयोजित एक महोत्सवको मङ्गलबार साँझको प्रस्तुति क्रममा एक युवती फ्यानले बार नाघेर स्टेजमै पुग्दै प्रकाशलाई सबैका अगाडि अँगालो हालेकी थिइन् ।
गीत गाइरहेका दुतराजसंगै झुमिरहेका हजारौँ दर्शकबीच एक्कासि यस्तो दृश्य देखिँदा वातावरण झनै तातिएको थियो । जहाँ उनले आफ्नो चर्चित गीत ‘चौली मैलै भो’ गाउँदै थिए । सोहीक्रममा एकजना ती युवती दौँडिदै स्टेजमा आइन् । सुरक्षाकर्मी र आयोजकले रोक्ने प्रयास गरे पनि उनी स्टेजसम्म पुगेर आफ्ना गायकलाई अंगालो हाल्न सफल भइन् ।
निकैबेरसम्म प्रकाशलाई अंगालो हालिरहिन् ती युवतीको उक्त क्षण कैद गरिएको उक्त भिडियो टिकटकमा भाइरल भइरहेको छ ।
यसअघि पनि पोखरामा भएको एक कार्यक्रममा युवतीले स्टेजमै पुगेर प्रकाशलाई अँगालो हालेको दृश्य भाइरल भएको थियो । जसले प्रकाशको लोकप्रियता र दर्शकप्रतिको उनको प्रभाव कति बलियो छ भन्ने पुष्टि गराएको छ ।
बुटवलको महोत्सवमा प्रकाशको प्रस्तुति हेर्न ठूलो संख्यामा दर्शकको उपस्थिती रहेको भिडियोहरूमा देखिन्छ । यी घटनाबारे प्रतिक्रिया जनाउँदै प्रकाशले यसलाई दर्शक तथा शुभेच्छुकको माया र आशिर्वादको रूपमा लिएका छन् ।
यतिबेला प्रकाश दुतराजको पछिल्लो गीत ‘छैन र माया’ले पनि सामाजिक सञ्जालमा उच्च चर्चा पाइरहेको छ ।
