निर्माता डुब्ने र ठगिने अवस्थाको अन्त्य गर्न पहल गर
नेपाली चलचित्र निर्माताहरूको छाता संस्था ‘नेपाल चलचित्र निर्माता संघ’ले गत सोमबारबाट नयाँ नेतृत्व पाएको छ । संघको १९औँ साधारणसभाले अध्यक्षमा उदय सुब्बा, महासचिवमा खगेन्द्र लामिछाने, सचिवमा युवराज गिरी, उपाध्यक्षमा रौनकविक्रम कँडेल र ज्योतिराज राई, कोषाध्यक्षमा रामप्रसाद रिजाल निर्वाचित भएका छन् ।
अब यो कार्यसमितिले चलचित्र निर्माताहरूको हकहितका लागि आवाज उठाउनुपर्नेछ । निर्माताहरूको आवाज सम्बन्धित निकायमा पुर्याउनुपर्नेछ । सरकारी निकायदेखि निजी सरोकारवाला निकायसम्म पुर्याउनुपर्नेछ ।
निर्माताहरूको समस्याको निराकारणका लागि बलियो भएर आवाज उठाउनु पर्नेछ । निर्माताहरूका समस्या कहाँकहाँ छन्, पहिचान गरेर त्यसको समाधानका लागि दरो खुट्टा टेक्नुपर्नेछ ।
निर्माताहरू चलचित्र घोषणादेखि नै पाइला–पाइलामा ठगिने गरेको गुनासो आउने गरेको छ । घोषणादेखि प्रदर्शनसम्म ठगिने गरेको गुनासोलाई सम्बोधन गर्नुपर्नेछ ।
करोडौं रुपैयाँ डुबाएर निर्माता सडकमा आउने गरेका छन् । यस्तो अवस्थामा विभागीय मन्त्रालय, चलचित्र विकास बोर्डमार्फत सरकारसामु आफ्ना समस्या के हुन् भनेर आफ्ना माग सम्बोधन गराउनुपर्नेछ ।
चलचित्र प्रदर्शक अथवा सिनेमा हलहरूसँग कसरी सकेसम्म सहज वातावरण बनाउने यसतर्फ संघले उल्लेख्य काम गर्नुपर्नेछ । चलचित्र निर्माता संघ चलचित्र घरहरूको संस्था चलचित्र संघको भगिनि संस्था जस्तो रहेको भन्ने आरोपबाट बाहिर निस्किनुपर्नेछ । निर्माताहरूको हकहितका लागि चलचित्र संघसँग फाइट गर्न ह्याउ राख्नुपर्नेछ ।
विशेषगरी नयाँ निर्माताहरू धेरै ठगिने गरेको, जसका कारण धेरै नयाँ निर्माता नदोहोरिने गरेको यथार्थ हो । यो अवस्था अन्त्यका लागि संघले विशेष योजना अघि सारेर योजनाबद्ध हिसाबले अगाडि बढ्नुपर्नेछ ।
चलचित्र बनाउनभन्दा प्रदर्शन गर्न कठिन हुने गरेको नयाँ निर्माता र निर्देशकको समस्यालाई ध्यानमा राखेर चलचित्र वितरण, प्रदर्शन मिति र शो बाँडफाँटमा हुने राजनीतिको सबैभन्दा पहिला अन्त्य गरिनुपर्छ । संघले केन्द्रमा चलचित्र प्रदर्शनमा हुने राजनीति अन्त्य गर्ने उद्देश्य राखेर यसको अन्त्यका लागि गम्भीरतापूर्वक काम गर्नुपर्नेछ ।
मौलिक सिनेमा, जसले नेपाली चलचित्रलाई अन्तर्राष्ट्रिय बजारमा पुर्याउन मद्धत गर्छन्, त्यस्ता सिनेमाको निर्माण, प्रदर्शन र अन्तर्राष्ट्रिय बजारमा जाँदा र अन्तर्राष्ट्रिय महोत्सवमा जाँदा विशेष सहुलियत दिने व्यवस्थाका लागि गम्भीरतापूर्वक पहल गर्नुपर्नेछ ।
कम्तीमा यति काम गर्न सकेन भने यो कार्यसमिति र यसअघिका कार्यसमितिमा केही फरक हुने छैन । त्यसैले कसैले देखाएको ललिपपमा नअल्झिएर बलियो खुट्टा टेकेर अगाडि नबढे यो कार्यसमितिको पनि केही औचित्य हुने छैन ।
